Katolski Posoł – 13. awgusta 2023
K zmužitosći pozbudźuje awtor zawodneho nastawka. A wón poruča, sej něšto zwažić, byrnjež wotwidźeć njebyło, dokal směr powjedźe.
Na spadowace ličby abonentow reaguje 14 (arcy-)biskopstwow w Němskej. Woni něšto nowe wuwiwaja. Potrjechena je tež cyrkwinska nowina wuchodoněmskich diecezow Tag des Herrn.
Njewjedra a powodźenja su w zašłych dnjach Awstrisku a Słowjensku domapytali. Potrjechena je tež mjeńšina Słowjencow w Korutanskej. Towarstwo Cyrila a Metoda (TCM) chce ze swojej akciju „Łužica pomha“ potrjechenych podpěrać. Dary móža so na konto TCM pod hesłom „Zhromadnje“ přepokazać
Wo tym, kak móžeš Boha w jeho stwórbje zetkać, pisa awtor serije „Wěra praktisce“. A wón poruča něšto činić, hdyž dowolnicy horliwje něhdźe „Njeje to krasne?“ praja.
Połnje dožiwjenjow wróći so 90 serbskich młodostnych a jich přewodźerjo ze swětoweho zetkanja w Portugalskej. Na młodźinskej stronje su někotre impresije a rozprawy, ale tež měnjenja wo tym podate.
Duchowny, kotryž posrědkuje ludźom cyrkej jako domiznu, woswjeći tele dny swoje 75. narodniny. Něhdyši nawoda Erfurtskeho měšniskeho seminara swjeći hdys a hdys tež Bože słužby w serbskich wosadach.
Spočatk awgusta we Wulkich Rědorjecach wotpalenu ewangelsku měšćansku cyrkej chcedźa zaso natwarić. Tamniša wosada zběra hižo dary.
Sakske nutřkowne ministerstwo je so k stawej slědźenja za skućićelemi wonječesćenja štyrjoch swjatych křižow loni w oktobru blisko Kulowa wuprajiło. Zhorjelske statne rěčnistwo je to samsne činiło, a to nastupajo wobškodźenja milenijoweho pomnika swjateju Cyrila a Metoda blisko Smochćic.
Smochčanski kubłanski dom swjateho Bena poskići wot srjedy do pjatka, 13. do 15. septembra, seminar, w kotrymž móža ludźo na stres, wysoke wužadanja abo žiwjenske krizy wotpowědnu podpěru z pomocu reziliency dóstać. Přizjewjenja su hač do srjedy, 23. awgusta, móžne.
Na kongres Adoratio – rěčenje
wo a modlenje před Najswjećišim
– su wěriwi a zajimcy
sobotu a njedźelu, 19. do
20. awgusta, do Noweje Cale
přeprošeni. Přizjewjenja přijimuja online.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja dale přijimuja.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
