Katolski Posoł – 13. apryla 2025
Wo čłowjeku w bibliskich tekstach z wjele mjezwočemi refkeltuje awtor w swojim zawodnym nastawku. Zdobom wón pohnuwa wo tym rozmyslować, štó samsny čłowjek za kóždeho křesćana je.
Swójby ze serbskich wosadow su pjatu póstnu njedźelu do Róžanta putnikowali. Hižo na spočatku Božeje mšě nawjazachu na to, štož k tomu trjebaja.
Biskop Heinrich Timmerevers je we wobłuku wizitacijow w swojej diecezy spočatk apryla serbsku wosadu wopytał. Tam je so tohorunja k přichodźe tuteje kaž tež tamnych serbskich wosadow wuprajił.
Skupinka čłonow serbskeho pasionskeho zjednoćenstwa přebywaše w małym měsće blisko Bayreutha. Tam wobhladachu sej hru, kotruž chcedźa w podobnej formje lětsa tež we Łužicy předstajić.
Putnicy Zhorjelskeho biskopstwa su w Swjatym lěće swjate městna w Romje wopytali. Nawjedował běše skupinu biskop Wolfgang Ipolt. Mjez wobdźělnikami běchu tež někotři Serbja.
Dołholětna korektorka Katolskeho Posoła Angela Rabowa bu do wěčnosće wotwołana. Pismiki a křesćanska wěra běštej jej čas žiwjenja wažnej stołpaj.
Wo swjedźenju, kotryž chcyše Jězus w Jerusalemje dožiwić, pisataj Hańžka a Feliks. Nimo toho su na dźěćacej stronje wšelake wobrjady w cyrkwi wopisane, kotrež su w martrownym tydźenju hinaše hač hewak.
Njebjelčanski młodźinski chór wuhotuje sobotu, 12. apryla, w 20.00 hodź. w tamnišim Božim domje „Hodźinku před Bohom“ pod hesłom „Žórło nadźije leži w Bohu“. Na pěsnje, psalmy a modlitwy słuchajo su wšitcy přeprošeni, před Bohom wutrać a so dušinje na jutry přihotować.
Na rozpominanje křižoweho puća z tekstami čěskeho basnika Milana Hrabala su wěriwi a zajimcy wulki pjatk, 18. apryla, w 15.30 hodź. do čěskeho Jiřetína pod Jedlovou njedaloko Varnsdorfa přeprošeni. Milan Hrabal a Martin Louka přednjesetaj teksty tež w serbskej rěči. Wšitcy su wutrobnje
přeprošeni.
Smochčanske kubłanišćo swjateho Bena přeprošuje na pasionsku hudźbu ze smyčkowym kwartetom Budyskeho Serbskeho ludoweho ansambla. Na programje wulki pjatk, 18. apryla, w 19.30 hodź. steji twórba „Sydom poslednich słowow našeho Wumóžnika na křižu“ Josepha Haydna (1732–1809).
Dekanatne dušepastyrstwo za dźěći a młodźinu we Worklecach přeprošuje šulerki
a šulerjow nětčišich 5. do 8. lětnikow w lěćnych prózdninach na jězbu do Zehrena blisko
Mišna. Wona wotměje so wot póndźele do pjatka, 21. do 25. julija. Přizjewjenja přijimuja so hač do njedźele, 18. meje,
online.
Katolska wosada Marije kralowny róžowca w Radworju pyta za swój dźěćacy dom „Alojs Andricki“ nuznje kubłarku abo kubłarja. Městno je najprjedy hač do junija 2026 wobmjezowane. Požadanja přijimuja hač do srjedy, 30. apryla.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 28. apryla, wot 18.00 do 21.00 hodź. na Budyskej farje. Dalše změja po wutorach, 29. apryla, w Kamjenicy, 13. meje w Lipsku a 27. meje w Drježdźanach planowane, kaž tež štwórtk, 15. meje, online. Zajimcy měli so online přizjewić. To je hač do jednoho tydźenja do woleneho zarjadowanja móžne.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Zajimcy měli so hač do srjedy, 30. apryla, online
přizjewić.
Serbska protyka
