Katolski Posoł – 12. nowembra 2023
Maće dosć rezerwow? Tole praša so serbski duchowny w swojim zawodnym nastawku. Zdobom wón wuwjedźe, kotrej dwě stronce w ewangeliju tuteje njedźele wopisany podawk ma.
K wujasnjenju a prewenciji duchowneho znjewužiwanja měli so zhromadźenstwa w cyrkwi z wida biskopa Heinricha Timmereversa intensiwnišo dohladować. Zdobom warnowaše wón před přirunowanjom ze seksualnym znjewužiwanjom.
Njewšědnu formu ma nowy wołtar Berlinskeje katedrale swjateje Jadwigi, kotruž tuchwilu saněruja a přetwarjeja. Tamniši arcybiskop Heiner Koch blido Bože spočatk nowembra poswjeći.
Wjace darow hač běše za nje we wulkim transporteru městna, su pomocnicy w Zejicach při akciji „Łužica pomha“ Towarstwa Cyrila a Metoda nakładowali. Pjenježne dary wužija tež za podpěru ludnosće w susodnym kraju, w kotrymž wójna knježi.
Na dobro cyrkwje a naroda staj mandźelskaj skutkowałoj, kotrajž staj nětko žadny kwas woswjećiłoj. Tež redakciju serbskeho katolskeho časopisa staj mnohe lěta podpěrałoj.
Wo jednym z rezultatow ducha časa pisa serbski měšnik w swojim rozmyslowanju. Zdobom wón zwuraznja, što tónle rezultat w starobje wuskutkuje a kak měli wšelake generacije z nim wobchadźeć.
Kata Młynkec je mnohe lěta zaćichim serbskemu duchownemu słužiła. Nětko móžeše něhdyša hospoza na 100 lět swojeho žiwjenja zhladować.
Po tym zo bu pomnik swjateju Cyrila a Metoda pola Stróžišća
lětsa spočatk februara skóncowany a z tym wonječesćeny,
mjeztym pak zaso sporjedźany, přeprošuje Towarstwo Cyrila
a Metoda na nyšpor ze znowaposwjećenjom.
Tón budźe njedźelu Chrysta Krala, 26. nowembra,
w 14.00 hodź.
Sekcija Swójba Towarstwa Cyrila a Metoda přeprošuje
wšitkich zajimcow na škotowy turněr, kotryž wuhotuje wutoru,
21. nowembra, we 18.30 hodź.
w Jasčanskej „Bjesadźe“. Za tych, kotřiž njemóža škot hrać, zarjaduje so zdobom
turněr z kartowej hru rommé.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Prěni termin budźe hižo wot 19. do 21. januara, a nic kaž dotal wozjewjene spočatk februara. Druhi dźěl sćěhuje wot 26. do 28. apryla.
Serbska protyka
