Katolski Posoł – 12. junija 2022
W aktualnym wudaću nańdźeće mjez druhim tole:
Potajnstwo Boha a jeho bytosće w Trojicy njebudźe čłowjek ženje wujasnić zamóc. Tole zwěsća awtor w swojim zawodnym nastawku. Wón pak doda, zo jedne z njebjeskich ćělesow ze swojim swětłom čłowječi duch a jeho mudrosć rozswětla a tak dohlad do potajnstwow zemskeje eksistency posrědkuje.
Bamž Franciskus je k swjatkam naležnje k přiměrej w Ukrainje a měrliwemu rozrisanju wójny namołwił. Na zetkanju z ćěkancami z Ukrainy a zbrašenymi dźěćimi we Vatikanje wupraji so swjaty wótc zdobom k spekulacijam wo ewentuelnym wopyće w Ukrainje.
Rada katolikow a Drježdźansko-Mišnjanske biskopstwo přeprošujetaj wšitkich zajimcow na prěni diecezanski wobswětowy dźeń pod hesłom WERT.VOLL.LEBEN. Tutón wotměje so sobotu, 9. julija, w Cröbernje pola Lipska. Što wopytowarjow tam wočakuje – wo tym powěda předsydka Rady katolikow w interviewje.
Tysacy wěriwych wobdźěli so swjatkownu póndźelu na tradicionelnym putnikowanju serbskich wosadow do Róžanta. Prjed hač podachu so procesiony zaso na dompuć, přijachu w hnadownej cyrkwi wosebite znamjo.
Na swjedźenju swjateho Antonija, póndźelu, 13. junija, poswjeći so nowa kapałka w małej serbskej wsy. Kóždy dźěl inwentara ma při tym swójsku stawiznu. Patrona za sakralne twarjenje su sej wědomje wupytali.
W Budyšinje je 58 wosobow sakrament swjateho firmowanja přijiało. Mjez nimi běše pjeć dorosćenych a wosom serbskich młodostnych. Swjedźensku Božu mšu wuhotowaše mjez druhim kwartet serbskich staršich a pjeć firmujomnych.
Pobrachowace městna k sedźenju wjedźechu k tomu, zo chcychu we Wotrowje před 100 lětami nowu cyrkej twarić. Wo tym pisa awtorka w dalšim dźělu swojeje serije k 250. róčnicy załoženja tamnišeje wosady.
W Zhorjelskej katedrali přija Markus Winzer z Kulowa měšnisku swjećiznu. Na primicnej Božej mši w swojej ródnej wosadźe prědowaše serbski duchowny z Roma.
Kak klinči domizna? Z tutym prašenjom zaběraše so spěwar něhdyšeje a mjez młodostnymi derje znateje němskeje hudźbneje skupiny. Swoju premjeru dožiwi dokumentacija, kotraž ma tež serbski podźěl, w Drježdźanach.
Cyrkwinski chór Lubijsko-Žitawskeje eforije a chór Budyšin předstajitej trójce oratorij „Podlěćo“. Prěnje předstajenje budźe njedźelu, 12. junija, we wobłuku cyrkwinskeho dnja w Bukecach. Dalšej koncertaj sćěhujetej sobotu, 2. julija, w Ketlicach a njedźelu, 3. julija, w Žitawje.
