Katolski Posoł – 11. junija 2023
Čehodla swjedźenje a zwonkowne znamjenja kaž procesion na swjedźenju Božeho ćěła tak wažne su, pisa serbski duchowny w swojim zawodnym nastawku. Zdobom wón wuswětla, bjeze čeho njemóže ničo rosć.
W Pančicach-Kukowje předstaja fotowa wustajeńca bohate serbske nabožne žiwjenje w klóštrje Marijinej hwězdźe a w přisłušnych wsach. Z wustajeńcu chce Towarstwo Cyrila a Metoda z.t. na lětušu 775. róčnicu załoženja klóštra skedźbnjeć.
W sewjernej Čěskej swjećeše serbski duchowny ze samostejacymi ze serbskich wosadow Božu mšu. Loni dorestawrowany Boži dom běše hłowny cil lětušeje wuprawy.
Kak móže swjaty Beno přikład k wuznaću wěry w dźensnišim času być? Wo tym rozmysluje awtor w swojim přinošku.
Na swójbnej Božej mši w Radworju bu dotalna nawodnica Katolskeho dźěćaceho domu „Alojs Andricki“ rozžohnowana. Zdobom bu jeje naslědnica oficialnje do swojeho zastojnstwa zapokazana.
Wo drohotnym kulturnym kuble pisa serbski duchowny w swojim přinošku. Při tym zwěsća, kak je so z tym zwisowacy wobraz wšědneho žiwjenja w minjenych lětdźesatkach změnił.
Serbscy młodostni zaběrachu so na swojim lětušim putnikowanju do Róžanta z tym, što rěka być putnik. Božej mši přizamkny so zetkanje wobdźělnikow lětušeho swětoweho zetkanja młodźiny w Lissabonje.
K modlenju a na Bože mšě před kopiju postawy sławneje Fatimskeje putniskeje madony su wěriwi w juniju w Drježdźansko-Mišnjanskim, Zhorjelskim a Litoměřickim biskopstwje přeprošeni. Mjez druhim budźe postawa njedźelu, 11. junija, w klóšterskej cyrkwi klarisow w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wón wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach. Přizjewjenja přijimuja hižo nětko online.
„Kedźbu pasle! Kak prawicarscy ekstremisća a reichsbürgerojo demokratiju podrywaja“ rěka hesło zarjadowanja, na kotrež su wšitcy zajimcy, wosebje politisce angažowani, wobydlerjo, zastupjerjo gmejnskich radow kaž tež lokalnych organizacijow a institucijow přeprošeni. Wone wotměje so srjedu, 14. junija, wot 19.00 do 21.00 hodź. w Jakubetzowym wustawje w Kulowje.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Wšelake hódančka a dalše zaběry za dźěći su tule přistupne.
Serbska protyka
