Katolski Posoł – 11. decembra 2022
W aktualnym wudaću nańdźeće mjez druhim tole:
Su křesćenjo kmani, poselstwo nowozakonskeho čitanja tuteje njedźele zapřijeć? Z tym zaběra so awtor w swojim zawodnym nastawku. Zdobom mjenuje wón přičinu, kotraž měła dosahać, zo so křesćenjo wjesela.
W Drježdźanach su so biskopja katolskeje a ewangelskeje cyrkwje w Sakskej ze statnym knježerstwom zetkali. Temy běchu prašenja zwjazanosće a solidarnosće, ale tež wzajomne wočakowanja stata a cyrkwje.
Samostejacy ze serbskich wosadow mějachu w Smochćicach swoje lětuše poslednje zetkanje. Serbski duchowny rozprawješe jim wo swojej třiměsačnej rekreaciji. Zdobom mějachu wobdźělnicy wysoki wopyt.
Kak a hdźe móže kóždy jednotliwc k tomu přinošować, swět trochu polěpšić? Tute prašenje steji w srjedźišću lětušeje adwentneje akcije katolskich biskopstwow, pomocnych skutkow, rjadow, zwjazkow kaž tež Katolskeho medijoweho domu w Bonnje.
W třoch serbskich wosadach su wokoło druheho adwenta wosebity nałožk hajili. Tón zwisuje ze swjatej, kotruž cyrkej spočatk decembra wopominaše.
Na adwentničce ewangelskich Serbow w Budyšinje su nowy spěwnik předstajili. Katolscy křesćenjo su tohorunja na nim sobu skutkowali. Wón je mjez druhim w Budyskej Smolerjec kniharni a w klóšterskim wobchodźe w Pančicach-Kukowje na předań.
Swoju tradicionalnu adwentničku mějachu serbscy młodostni druhu adwentnu njedźelu we Wotrowje. Nyšpor wuhotowa chór 1. serbskeje kulturneje brigady.
Wo wuznamnymaj serbskimaj wosobomaj, kotrajž staj so wo jednotu mjez konfesijomaj prócowałoj, pisa awtorka w swojim přinošku. Jimaj běše zdobom wosebite lěto wěnowane, kotrež je nětko zakónčene.
Serbski organist a komponist wobrubi w połnje wobsadźenej klóšterskej cyrkwi w Pančicach-Kukowje hudźbny nyšpor. Mjez druhim zaklinčachu jeho swójske twórby a twórby dalšich načasnych komponistow.
W dekanatnym dušepastyrstwje za dźěći a młodźinu we Worklecach ma so k najblišemu móžnemu terminej dźěłowe městno w pastoralce za dźěći, wobmjezowane jako zastup za dobu staršiskeho časa, wobsadźić. Požadanja su hač do pjatka, 6. januara, móžne.
W Radworskim Katolskim serbskim dźěćacym domje „Alojs Andricki“ ma so k najblišemu móžnemu terminej městno nawodnicy abo nawody znowa wobsadźić. Pisomne požadanja přijimuja hač do soboty, 31. decembra.
Dekanatne dušepastyrstwo dźěći přeprošuje šulerjow, kotřiž budu w šulskim lěće 2023/2024 w 5. do 8. lětniku, na jězbu do Zehrena blisko Mišna. Wona budźe wot póndźele do pjatka, 9. do 13. oktobra.
Dekanatne dušepastyrstwo młodźiny přewjedźe klětu za zajimowanych serbskich młodostnych serbskorěčny kurs JuLeiCa. Wón wobsteji z dweju dźělow, kotrejž wotmějetej so w Smochćicach, a wobsahuje zdobom kurs prěnjeje pomocy.
Serbska protyka
