Katolski Posoł – 11. awgusta 2024
Wo darje włóžnych wočow pisa awtor w swojim zawodnym nastawku. Mjez druhim wón tomu pozbudźuje, zo měł je čłowjek hdys a hdys měć a rozłožuje, što wone zwuraznjeja.
Serbski duchowny budźe kanonik biskopskeho kapitla w słowjanskim wukraju. Z tym smě wón tule funkciju dwójce wukonjeć. Zapokazany budźe wón sobotu, 28. septembra ze štyrjomi dalšimi nowymi kanonikami.
W klóštrje Marijinej hwězdźe kaž tež w Róžeńčanskej swjatnicy su so złóstnistwa stali. Policija pad přepytuje.
Ewangelska cyrkej swjateje Marije w Kamjencu dóstanje wosebity zwón, kiž ma zhromadnje z dalšimi zwuporjedźenymi zwonami składnostnje jubileja prěnjeho naspomnjenja města před 800 lětami klětu zwonić. Za to dósta wosada tele dny přizwolenje za spěchowanje.
Ministranća ze wšeho swěta putnikowachu lětsa 13. raz do Roma. Mjez dźesatkami tysacami bě tež 150 serbskich słužownikow k wołtarjej.
„Štó(ž) wěri? Kak křesćanska je sakska politika?“ rěkaše hesło zarjadowanja, na kotrež běchu Katolski a Ewangelski běrow Sakskeje kaž tež Katolske kubłanje dorosćenych w Sakskej do Budyšina přeprosyli. Na nim předstaji katolski měšnik a wědomostnik swoju analyzu sakskich wólbnych programow wšelakich stronow
Sekcija Swójba Towarstwa Cyrila a Metoda přeprošuje swójby na zabawne popołdnjo, kotrež wotměje so njedźelu, 1. septembra, w Radworju. Spočatk budźe w 14.00 hodź. z nyšporom we wosadnej cyrkwi. Přizamknje so wodźenje po wsy z Benom Bělkom. Dźěći móža při kwisu najwšelakoriše myta dobyć.
Na zhromadne dny z diplomowym teologu Sebastianom Mutku su wšitcy mužojo wot pjatka do njedźele, 6. do 8. septembra, do benediktinskeho klóštra we Wechselburgu přeprošeni. Přizjewjenja su online móžne.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do póndźele, 12. awgusta, online.
Přichodny seminar k přihotej na sakrament mandźelstwa budźe
pjatk a sobotu, 29. a 30. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach hač do srjedy, 28. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
