Katolski Posoł – 10. nowembra 2024
Wo třoch wučbach ze starozakonskeho čitanja tuteje njedźele pisa awtor zawodneho nastawka. Z tychle wuprajenjow wuwiła wón konkluziju, kotraž móže kóždemu pomhać.
Tři biskopstwa we wuchodnej Němskej su na prěni srjedźoněmski medijowy dźeń do Lipska přeprosyli. Při tym wěnowachu so temje „Wšitko fake? Wěrnosć a woprawdźitosć w medijach a nabožinje“.
Biskop Heinrich Timmerevers je kandidatow za stajny diakonat swjatočnje přiwzał. Mjez nimi je jedyn z Budyšina. Nimo toho ma nowowuhotowana křinja z relikwiju swjateho Bena nětko swoje trajne městno w Drježdźanskej katedrali.
Bamž Francisku je so na wopomnjenskim dnju Chudych dušow na Romski kěrchow Laurentino podał. Tam měješe wosebitu naležnosć.
Serbski rjemjeslnik z wosebitym talentom wustaja někotre swoje wudźěłki w Budyskej Serbskej kulturnej informaciji. Wón je samo za kardinala a za klóšter w Romje nadawk spjelnił.
Saksofon, pišćele, encyklika a cyrkwine wokno hrajachu na nyšporje w Baćonju wažnu rólu. Z Łužicy pochadźacej wuměłcaj, kotrajž staj čas powołanskeho žiwjenja w Berlinje skutkowałoj, wuhotowaštaj Božu słužbu z hudźbnymaj instrumentomaj.
We Worklecach je wosadny farar Měrćin Deleńk kermušnu njedźelu 160 lět stary a nětko ponowjeny modlerski stołp znowa poswjećił. Ale dotal njeje znate, z kotreje přičiny jón tehdy postajichu.
Hańža Hadankec z Wudworja je přeco we wěrje, nadźiji a lubosći skutkowała. Nětko bu do wěčnosće wotwołana.
Mišterske twórby, w kotrychž swjaty křiž w srjedźišću steji, su tema wustajeńcy w Žitawje. Tam móža sej je zajimcy wot doby srjedźowěka hač do dźensnišeho wobhladać.
Jezuitski rjad je wulki wuběr duchownych poskitkow w interneće w nowej platformje zjimał. Mjez awtorami je z Kulowa pochadźacy měšnik.
Wo słowje lěta w Sakskej rozmysluje serbski duchowny. Wón pak tež na młodźinske słowo lěta w Němskej zhladuje.
Wo nazymje jako wobraz za čłowječe žiwjenje pisataj Hańžka a Feliks. Na dźěćacej stronje pak zhonja dźěći tohorunja to a tamne kołowokoło zapřijećow, kotrež so w zwisku ze zbóžnymi a swjatymi wužiwaja.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Sekcija Swójba Towarstwa Cyrila a Metoda z.t. přeprošuje wšitkich zajimcow na škotowy turněr, kotryž wotměje so wutoru, 19. nowembra, na předwječoru pokutneho dnja, we 18.30 hodź. w Jasčanskej „Bjesadźe“. Wuraznje su nimo muži tež žony přeprošene, wšojedne kotreje staroby. Za tych, kotřiž njemóža škot hrać, zarjaduje so zdobom turněr z kartowej hru rommé.
Hornjołužiski zwjazk Carity pyta k najblišemu móžnemu terminej za swoju Dnjowu hladarnju „Při Krabatowym puću“ we Worklecach přidatnu wosobu za hladanje a wobstaranje. Požadanja přijimuje nawodnica dnjoweje hladarnje Jěwa-Marja Šnajderowa we Worklecach.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Wotedać hodźa so dary hišće na sćěhowacymaj dnjomaj pola Špitankec w Zejicach, Kamjenska dróha 10: pjatk, 15. nowembra, wot 15.00 do 18.00 hodź. kaž tež sobotu, 16. nowembra, wot 9.00 do 11.00 hodź.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Serbska protyka
