Katolski Posoł – 10. julija 2022
W aktualnym wudaću nańdźeće mjez druhim tole:
Čehodla je Boža mša w zhromadnosći lěpša hač na wobrazowce? Awtorka pohnuwa w swojim zawodnym nastawku k tomu, wo tym zaso raz rozmyslować. Při tym pokaza na to, k čemu su kemše tež hódne.
Drježdźansko-Mišnjanski biskop Heinrich Timmerevers je so w interviewje z Katolskej powěsćernju k swojemu zadźerženju jako Münsterski swjećacy biskop wot 2001 do 2016 w zwisku ze znjewužiwanjom wuprajił. W nim wón tež swójske zmylki přizna a wo wodaće prosy.
Dotalny Olomoucski arcybiskop Jan Graubner je nowy Praski arcybiskop. Wón bu sobotu, 2. julija, w tamnišej katedrali swjateho Wita na swjatočnej Božej mši do swojeho zastojnstwa zapokazany. Na njej wobdźělichu so nimo wěriwych tež biskopja z wjacorych krajow kaž tež zastupjerjo politiki.
„Hdyž smy so tule w Róžeńće zhromadźili, potom runja swjatej Mariji a swjatej Hilžbjeće Boha chwalimy“, rjekny farar Beno Jakubaš w swojim prědowanju na putniskich kemšach sobotu, 2. julija. Syła serbskich wěriwych je so na tym dnju pěši w procesionje na hnadowne městno podała.
Mało znate něhdźe sto lět stare prozowe teksty serbskeho duchowneho je z Radworja pochadźacy a w Awstriskej skutkowacy serbski dźiwadźelnik předstajił. Z gestiku a wurazom rěče je wón ju z tym zdobom do dźensnišeho časa přenjesł.
„Wšón čas žiwjenja přewodźeš mje swěrnje“ rěkaše hesło 46 młodostnych serbskeje wosady, kotřiž přijachu wot biskopa Heinricha Timmereversa sakrament swjateho firmowanja. W přihoće na njón běchu so hłubšo z prašenjemi wěry zaběrali, kotrež wuwabichu tu a tam tež čiłu diskusiju.
Cyrkej je tež za korutanskich Słowjencow podobnje kaž pola katolskich Serbow wažna zepěra k wobstaću narodneje mjeńšiny. Wo swojich dožiwjenjach na lětušej Europeadźe, kotraž so w Korutanskej wotmě, pisa awtor w swojim přinošku.
W Dobroščanskej wjesnej kapałce swjećachu wěriwi na swjedźenju swjateho Jana Křćenika patronatnu Božu mšu. W swojim prědowanju nawjaza serbski duchowny zwisk mjez skutkowanjom swjateho a dźensnišim časom.
Wo podpěru proša cistercienscy mniša z Noweje Cale štwórtk, 14. julija, wot 9.30 do 16 hodź. we Worklecach. Na tamnišim hrodźe chcedźa klóštersku biblioteku z něhdźe 30.000 knihami jako mjezyskład zarjadować. Štóž chcył jim při tym pomhać, měł so na tym dnju přidružić. –
Smochčanske kubłanišćo swjateho Bena přeprošuje wot srjedy do njedźele, 31. awgusta do 4. septembra, na putnikowanje z kolesom. Mjez druhim wopytaja wobdźělnicy Zhorjelc, Kulow a Worklecy. Přizjewjenja přijimuja hač do srjedy, 10. awgusta, online.
Serbska protyka
