Katolski Posoł – 10. decembra 2023
Za čo měli sej křesćenjo chwile brać, tež w adwentnym času? Wo tym pisa awtor w swojim zawodnym nastawku.
Sakske knježerstwo je z wysokimi zastupjerjemi wulkeju cyrkwjow rěčało. Wobě stronje widźitej wosebitu zhromadnu zamołwitosć na wjacorych polach.
Swjate město židow, křesćanow a muslimow steješe w srjedźišću přednoška na zetkanju samostejacych ze serbskich wosadow w Smochćicach. Při tym dźeše tež wo njeskónčace so swětne a nabožne konflikty.
W Ralbicach běchu seniorojo na zhromadne wosadne popołdnjo přeprošeni. Wuhotowało běše je Muski chór Delany.
Wo konflikće na Bliskim wuchodźe rozmysluje serbski duchowny w swojim přinošku. Při tym pokazuje zdobom na wójnu w Ukrainje. Mjez druhim wón tež naspomni, za čim ludźo po wšěm swěće mjeztym zaso pytaja.
Prěni raz wuhotowaše chór 1. serbskeje kulturneje brigady adwentničku serbskeje dekanatneje młodźiny ze swojej nowej dirigentku. Po nyšporje zetkachu so k zabawje na farje.
Klětu poskići młodźinske dekanatne dušepastyrstwo zaso rjad zarjadowanjow. Přehlad je tule wozjewjeny.
Biblioteka klóštra w Marijinym dole je předata. Wona wostanje w Sakskej.
Hodowny dar za swojich swójbnych abo přećelow zbliska a zdaloka móhła serbska abo dwurěčna kniha być. Katolski Posoł je někotre z nabožnym abo duchownym pozadkom zestajał.
Na mjeztym 12. kulturnu zymu přeprošuje Monika Gerdesowa do swojeje putniskeje hospody w Chrósćicach. Hač do klětušeho februara poskićuje wona wšelake zarjadowanja za dźěći a dorosćenych w serbskej a němskej rěči.
W putniskej hospodźe w Hirschfeldźe budu wot prěnjeje adwentneje njedźele, 3. decembra, hač do swjedźenja Předstajenja Knjeza, pjatk,
2. februara, zaso Bože narodki
wustajene. Cyłkownje poskića 27 wodźenjow po wustajeńcy.
Dekanatne dušepastyrstwo dźěći přeprošuje šulerjow 4. do
6. lětnika na kreatiwnu dźěłarničku, kotraž wotměje sobotu, 16. decembra, w Don Boskowym domje we Worklecach.
Zajimcy móža wolić, hač wobdźěla so wot 9.00 do 11.30 hodź. abo wot 12.30 do 15.00 hodź. Přizjewjenja su online hač do póndźele, 11. decembra, móžne.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje. Přizjewjenja přijimuja hač do wutory, 12. decembra.
Dekanatne dušepastyrstwo za dźěći přeprošuje šulerki a šulerjow 5. do 8. lětnika klětu w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija 2024. Přizjewjenja přijimuja hač do njedźele, 31. měrca 2024, online.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Prěni termin budźe hižo wot 19. do 21. januara, a nic kaž dotal wozjewjene spočatk februara. Druhi dźěl sćěhuje wot 26. do 28. apryla.
Serbska protyka
