Katolski Posoł – 1. septembra 2024
Konfliktej, kotryž ewangeliji tuteje njedźele tematizuje, wěnuje so awtor w swojim zawodnym nastawku. Na zakładźe toho rozmysluje tohorunja wo wobchadźe z tradicijemi a starodawnymi prawidłami.
W Smochčanskim kubłanišću swjateho Bena wuhotowachu serbscy hudźbnicy a spěwarka beneficny koncert. Dochody přewostaja dnjowym dźěćacym přebywanišćam w nošerstwje Hornjołužiskeho dobroćelskeho zwjazka.
Ze swjedźenjom Marije donjebjeswzaća zwjazachu wěriwi lětsa w Kulowje dalši podawk. Na tym dnju bu zdobom nowy duchowny oficialnje witany, kotryž budźe we wosadźe sobu skutkować.
Serbska dekanatna młodźina je so tež lětsa na zhromadny wulět podała. Wobdźělnicy móžachu na samsnym městnje mjez poskitkomaj wolić.
W farskej wikariji w Pančicach-Kukowje buchu nowi młodostni přiwzaći. Na zhromadnym wječoru po Božej mši předstajichu jim starši młodostni mjez druhim nadawki we wosadźe.
Z wšelakimi darami podpěra Budyski Ekumeniski tachantski wobchod z.t. socialnu załožbu w Ukrainje. W awgusće je so tudyši předsyda wospjet do wuchodoeuropskeho kraja podał a dary přepodał.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so štwórtk, 3. oktobra. Zajimcy měli so online přizjewić.
Ralbičanska wosadna rada so wo to stara, zo by móhł na zapokazanje kanonika Šćěpana Delana sobotu, 28. septembra, bus do čěskich Litoměřic jěć. Zajimcy měli so hač do soboty, 14. septembra, pak do lisćiny w interneće zapisać pak so wosobinsce pola Rafaela Ledźborja w Ralbicach přizjewić.
Orchester Serbskeho ludoweho ansambla (SLA) wuhotuje zhromadnje ze spěwnymi solistami a z organistom Tomašom Žurom „Portretowy koncert za Ulricha Pogodu & Tomaša Žura“. Prěni budźe sobotu, 7. septembra, w 19.00 hodź w Choćebuskim konserwatoriju, dalši njedźelu, 22. septembra, w 16.00 hodź. w Kulowskej cyrkwi Marije donjebjeswzaća.
Přichodny seminar k přihotej na sakrament mandźelstwa budźe
pjatk a sobotu, 29. a 30. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach hač do njedźele, 1. septembra, online.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do njedźele, 1. septembra, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
