Katolski Posoł – 1. oktobra 2023
Wo zwjazku, kotryž měł podobizna swěry zwjazka z Bohom być, pisa duchowny w swojim zawodnym nastawku. Dale wón wuswětla, kotre słowo njeměł čłowjek cofnyć.
W Chrósćicach wotmě so tež lětsa zaso nyšpor z požohnowanjom konjacych zapřahow. Na nim běše zběrka za ponowjenje wonječesćeneho pomnika pola Stróžišća.
Wón je mnohe słužby a zastojnstwa wukonjał a jako měšnik spomóžnje a swěrnje skutkował. Nětko bu prelat Bernhard Rachwalski do wěčnosće wotwołany.
Duch dźakownosće a zhromadnosće knježeše poslednju njedźelu septembra w Ralbicach. Tamnišu domchowanku zwjazachu wěriwi zdobom ze swójbnym swjedźenjom.
W Chróšćanskim Domje swjateje Ludmile swjećachu wobydlerjo, přistajeni a hosćo srjedź septembra swój patronatny swjedźeń. W swojim prědowanju dopomni serbski duchowny tež na započatki domu.
Serbski komponist a spěwar njeje samostejacym w Smochćicach jeničce přednošował. Wón je jich tež na zabawne wašnje sobu zapřijał.
Srjedź oktobra dožiwi žortna hra z čłowjeskej hłubokosću swoju premjeru. Z njej poda so Budyske Němsko-Serbske ludowe dźiwadło tež na serbske wsy.
Wěriwi Budyskeje wosady swjateho Pětra zmóžnichu swojim serbskim ministrantam zhromadny kónc tydźenja. Tón přežiwichu woni w Žitawskich horach.
Pod hesłom „Słowa kaž hudźba“ dožiwichu wopytowarjo hudźbno-literarny koncert w klóšterskej cyrkwi w Pančicach-Kukowje. Wuhotowałoj běštaj jón dołho w Berlinje skutkowacy serbski organist a jeho mandźelska.
Što ma wulka bitwa z třomi pomjenowanjemi z měsacom činić, kotryž so z tutej njedźelu započnje, pisataj Hańžka a Feliks. Zdobom móža so dźěći z natwarom róžowca zeznajomić.
Domchowanka steji w srjedźišću dalšeho přinoška serbskeho duchowneho w rjedźe „Wěra praktisce“. Mjez druhim wón k tomu pozbudźa, cyle wosobinsku domchowanku swjećić.
Wona je so hosćom wjace hač lětdźesatkaj ze sćerpnosću a zrozumjenjom wěnowała. Nětko bu wjelelětna serbska sobudźěłaćerka Smochčanskeho kubłanišća swjateho Bena na wuměnk rozžohnowana.
Za podpěru Serbow po přirodnej katastrofje spočatk awgusta wuprajeja Korutanscy Słowjency swój dźak. Mjez druhim redaktor tydźenika Nedelja pisa, za čo su pjenjezy Towarstwa Cyrila a Metoda nałožili.
Wječork pod hesłom „Putnikować za měr – Liebt das Böse gut“ wotměje so wutoru, 3. oktobra, w 19.00 hodź. w Chróšćanskim Hórnikowym domje. Absolwujo ekumeniski putniski puć z kolesom přednjesetaj putnikaj Esther Koch a Karel Dolista na swojej staciji teksty wšelakich awtorow. K tomu zaklinči pišćelowa hudźba.
Pod hesłom „Orgel meets Rock“ wotměje so njedźelu, 8. oktobra, we 18.00 hodź. dalši koncert w rjedźe duchowneje hudźby w Budyskej tachantskej cyrkwi. Zaklinča wšelake hudźbne stile, kotrež nawjazuja na tradicionelnu pišćelowu hudźbu, ale so tež přez wliwy kaž rock, jazz abo pop dale wjedu.
Předstajenje hry „Mór a lubosć“ móža sej zajimcy wotnětka jako film wobhladać. Wón je w interneće přistupny.
Duchowny oratorij „Wěra, nadźija, lubosć“ serbskeho komponista Feliksa Brojera z Budyšina předstaji wokalowy ansambl
TonArt z Münstera tutu njedźelu, 1. oktobra, w 17.00 hodź.
w ewangelskej cyrkwi we Wjazońcy a póndźelu, 2. oktobra,
w 19.00 hodź. w Budyskej Marje Marćinej cyrkwi. Zastup na woběmaj koncertomaj je darmotny.
Worklečanske młodźinske dušepastyrstwo přewjedźe tež klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach, tam z přenocowanjom. Zajimcy měli so nimo toho na kursu prěnjeje pomocy wobdźělić. Tón budźe sobotu, 2. měrca, we Worklečanskim Don Boskowym domje. Přizjewjenja přijimuja online.
Serbska protyka
