Katolski Posoł – 1. decembra 2024
Wo tym, što njeměli křesćenjo podusyć, wosebje w adwenće nic, pisa serbski duchowny w swojim zawodnym nastawku. Zdobom wón k tomu pohnuwa, w zašłosći a zwučenosćach tčacy njewostać, ale dowěrje do Boha rosć dać a so přichadźacemu swětłu znowa wotewrěć.
Na swjatočnej Božej słužbje bu Berlinska katedrala swjateje Jadwigi znowa wotewrjena. W minjenych šěsć lětach běchu ju znutřka wobšěrnje přetwarili a saněrowali.
Towarstwo Cyrila a Metoda z.t. ma jako wudawaćel financowanje Katolskeho Posoła na starosći a dyrbi tuž wo wurunany financny plan prócować. Nětko je wone rozsudźiło, zo dyrbi so płaćizna za abonentow klětu přiměrić.
Nje–słyšanemu poselstwu w adwenće wěnuje so duchowny w swojim rozmyslowanju. Při tym złožuje so na mysle němskeho teologi, kotrež móhli křesćanej w dohodownym času pomhać.
Na njewšědnu namakanku skedźbnja awtor w swojim přinošku wo znatym serbskim wučerju a redaktoru Katolskeho Posoła, kotryž pak je hižo před wjace hač 50 lětami zemrěł. Nimo toho tež wopisuje, na kotre wašnje je tón swoje slědy we Wosadniku zawostajił.
Trudla Kuringowa je so za cyrkej a swój narod horiła kaž tež so na najwšelakoriše wašnje za njej angažowała. Nětko bu wona do wěčnosće wotwołana.
Z prašenjom, kak sej Boha předstajeja, je so 70 młodostnych njedźelu Chrysta Krala w Chrósćicach zaběrało. Woni běchu so tam ke kóždolětnemu młodźinskemu nyšporej zhromadźili.
Dekanatne dušepastyrstwo za młodźinu je přehlad zarjadowanjow za młodostnych a młodych dorosćenych zestajiło. Tón je tež online přistupny.
Smochčanske kubłanišćo swjateho Bena ma so organizatorisce a hospodarsce hinak nastajić. Jeho dotalny rektor Sebastian Kieslich jenički dom tajkeho razu w biskopstwje kónc lěta wopušći. K tomu je Katolskemu Posołej interview podał.
Wo swojim lětušej předewzaću za adwentny čas pisataj Hańžka a Feliks. A hladajo na bližacy so wopomnjenski dźeń swjateho Mikławša dźěći zhonja, na čim biskopa spóznaješ.
Pod hudźbnym nawodom Kathariny Dickopf wuhotuje orchester Budyskeho Serbskeho ludoweho ansambla tutu njedźelu, 1. decembra, w 17.00 hodź. adwentny koncert na tamnišej žurli. Mjez druhim zaklinča twórby serbskeju komponistow Helmuta Fryče a Jana Rawpa.
Towarstwo swjateje Filomeny z.t. chce tež lětsa zaso dźěći a swójby w maćerno-dźěćacym domje w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Pakćiki kaž tež poćehnjenja a hygieniske artikle zběraja wot póndźele do štwórtka, 2. do 5. decembra, wšědnje wot 17.00 do 18.00 hodź. w Smjerdźečanskim kulturnym domje.
W Jaseńcy přewjedźe so sobotu, 7. decembra, kaž hižo wjele lět na předwječoru druheho adwenta, spěwny wječork, tónraz pak w Budarjec bróžni, na dróze do směra Dobrošic, čisło 14. Započatk je w 19.45 hodź. Wječork wuhotujetej skupinje PoŠtyrjoch a Wólbernosće. Wunošk wječora je na dobro Towarstwa Cyrila a Metoda z.t. postajeny. Te chce pjenjezy za wutworjenje parka blisko swjatnicy w Róžeńće nałožić.
Drježdźanscy Kapałnicy wuhotuja sobotu, 7. decembra, w 19.30 hodź. adwentny koncert w cyrkwi Smochčanskeho kubłanišća swjateho Bena. Lisćiki za wječor móža sej zajimcy online skazać. Druhu adwentnu njedźelu, 8. decembra, koncertuja kapałnicy w Baćońskej cyrkwi Jězusoweje wutroby. Započatk je w 17.00 hodź.
Dekanatne dušepastyrstwo za młodźinu přeprošuje młodych dorosćenych na kubłanski dźeń z kapłanom Florianom Mrózom. Tón budźe njedźelu, 29. decembra, wot 10.00 do 18.00 hodź. Přizjewjenje přijimuje dekanatne dušepastyrstwo hač do njedźele, 8. decembra, online.
Dekanatne dušepastyrstwo za dźěći přeprošuje šulerjow 6. do 8. lětnika do Don Boskoweho domu we Worklecach na kreatiwnu dźěłarničku, kotraž budźe sobotu 14. decembra. Wobdźělić móža so pak dopołdnja wot 9.30 do 12.00 hodź. abo popołdnju wot 13.00 do 15.30 hodź. Přizjewjenja přijimuja online hač do póndźele, 9. decembra. Ličba městnow je wobmjezowana.
We wobłuku 13. kulturneje zymy w putniskej hospodźe Moniki Gerdesoweje w Chrósćicach přednošuje Beno Bělk sobotu, 7. decembra, w 19.45 hodź. pod hesłom „Saudi-Arabska, žony …“. Hižo w 16.00 hodź. poskićuje hosćićelka serbske dźěćace kino.
Drježdźanski komorny chór Ad libitum wuhotuje njedźelu, 8. decembra, w 16.30 hodź. pod hesłom „Adwent“ hudźbny koncert w cyrkwi klóštra Marijineje hwězdy w Pančicach-Kukowje. Wšitcy su wutrobnje přeprošeni.
Na adwentne wiki su wopytowarjo sobotu, 14. decembra, wot 10.00 do 18.00 hodź. do klóštra Marijineje hwězdy prošeni. Mjez druhim poskića hodowne štomy, Ochranowske hwězdy a swójske wudźěłki kaž wšelake likery, sele a wolije, kotrež klóšterske sotry same zhotowjeja.
Spirituelnu zwukowu instalaciju wo psalmje 23 móža wopytowarjo po lěće 2021 znowa w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze swětłowymi efektami. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9.00 do 20.00 hodź. přistupny.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Worklečanske młodźinske dušepastyrstwo přewjedźe klětu zaso kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla, w Smochčanskim kubłanišću swjateho Bena, tam z přenocowanjom. Kompletne wukubłanje je darmotne.
Serbska protyka
