Katolski Posoł – 4. decembra 2022
W aktualnym wudaću nańdźeće mjez druhim tole:
Wo zasadnym rozdźělu mjez Janom Křćenikom a Jězusom pisa awtor w swojim zawodnym nastawku. Wobrazliwje poćahuje so při tym tež na wodu wuznamneje rěki w Swjatym kraju.
Němska biskopska konferenca je nowe cyrkwinske dźěłowe prawo wobzamknyła. Přesadźić chcedźa je tež w Drježdźansko-Mišnjanskej a Zhorjelskej diecezy.
Po wonječesćenju swjatych křižow wulubja policija pjenjezy k wuslědźenju skućićelow. To je wuslědk rozmołwow nawody Sakskeho Katolskeho běrowa a serbskeho zapósłanca krajneho sejma w sakskim nutřkownym ministerstwje. Temu tež we wusyłanju „Kripo live“ telewizije MDR tutu njedźelu wobjednawaja.
Vatikan Synodalny puć w Němskej zjawnje kritizuje. Wobmyslenja dweju kurijoweju kardinalow, kotrež staj wonaj w Romje němskim biskopam w internej debaće přednjesłoj, buchu nětko posłownje wozjewjene.
Před 75 lětami běše israelski wědomostnik štyri z najwažnišich archeologiskich namakankow 20. lětstotka kupił. Nadešli běchu je w prózdnjeńcy w Zapadnojordanskim kraju.
Zhorjelski biskop Wolfgang Ipolt je nowy zwón z trojorěčnym napisom w Němcach poswjećił. Tón nasta w Nižozemskej a ma štyrjoch kmótřow.
W klóšterskej cyrkwi w Pančicach-Kukowje wuhotowa chór Lipa adwentny koncert. Z hosćom běchu a sobu skutkowali su tohorunja Markkleebergscy wokalisća.
Wobydlerjo Dobrošic a dalšich wsow zhromadźichu so prěnju adwentnu njedźelu k zhromadnemu nyšporej we wjesnej cyrkwičce. Po tym požohnowa serbski duchowny pyramidu, kotraž steji před Božim domom.
Chór Lilija kaž tež dźěći wosadneje šole wuhotowachu tradicionalne popołdnjo seniorow Ralbičanskeje wosady. Mjez druhim zhonichu přitomni tež něšto k stawiznam adwentneho wěnca.
Wot Ducha Swjateho so honić dała je Serbowka, kotraž skutkowaše jako wosadna referentka mnoho lět zwonka Łužicy. Nětko bu Hana Wowčerkec do wěčnosće wotwołana.
Wo wosebitym adwentnym kalendrje pisataj Hańžka a Feliks. Zdobom zhonja dźěći wo třoch swjatych, kotrež su w adwenće jara woblubowani, a kotre nałožki so wokoło jich wopomnjenskich dnjow haja.
W Radworskim Katolskim serbskim dźěćacym domje „Alojs Andricki“ ma so k najblišemu móžnemu terminej městno nawodnicy abo nawody znowa wobsadźić. Pisomne požadanja přijimuja hač do soboty, 31. decembra.
Dekanatne dušepastyrstwo dźěći přeprošuje šulerjow, kotřiž budu w šulskim lěće 2023/2024 w 5. do 8. lětniku, na jězbu do Zehrena blisko Mišna. Wona budźe wot póndźele do pjatka, 9. do 13. oktobra.
Dekanatne dušepastyrstwo młodźiny přewjedźe klětu za zajimowanych serbskich młodostnych serbskorěčny kurs JuLeiCa. Wón wobsteji z dweju dźělow, kotrejž wotmějetej so w Smochćicach, a wobsahuje zdobom kurs prěnjeje pomocy.
Serbska protyka
