Katolski Posoł – 30. oktobra 2022
Poslednjemu dźělu Jězusoweho puća z Jericha do Jerusalema, kotryž jewi so w ewangeliju tuteje njedźele, wěnuje so awtor w swojim zawodnym nastawku. Při tym wón mjez druhim rozłoži, što maja křesćenjo činić, zo by Bóh tež w dźensnišim času w nich jednać móhł.
Blisko dweju dwurěčneju wsow Hornjeje Łužicy buchu wospjet swjate křiže wonječesćene. Cyrkej a zapósłanc chcetaj k tomu rozmołwy w nutřkownym ministerstwje wjesć.
Na třidnjowsku jězbu poda so skupinka ministrantow serbskeje wosady w nazymskich prózdninach. W jednym ze słowjanskeju krajow, kotrež na Němsku mjezujetej, běchu pućowali a w tamnym so kupali.
W Chróšćanskej wjacezaměrowej hali „Jednota“ dožiwi nowa serbska spěwohra swoju premjeru. Publikum dźakowaše so wjace hač 140 akteram na jewišću a dalšim za nim, mjez nimi hłownje dźěći, z trójnej „Sławu“ za jich wukon.
Z Kulowa pochadźacy serbski duchowny je w Romje nadawk wicerektora bamžowskeho instituta přewzał. Dom zamołwja mjez druhim dušepastyrstwo za němskorěčnych wěriwych w Romje a putnikow.
Wo hódnotach žiwjenja pisaše Katolski Posoł před sto lětami. Awtorka rubriki pak zwěsći zdobom paraleli k zarjadowanju a jubilejej, kotrejž swjećeštej so lětsa w Serbach.
Na nowy a samostatny puć bu 63 młodostnych w Ralbicach wupósłanych. Woni přijachu na swjatočnej Boži mši sakrament swjateho firmowanja.
Klóšter Marijina hwězda w Pančicach-Kukowje pyta za putnisku cyrkej w Róžeńće wosobu, kotraž chcyła nadawki zwóńka a rjedźerskeje mocy přewzać. Zajimcy měli so hač do srjedy, 30. nowembra, přizjewić.
Z podpěranjom ponowjenja Baćońskich pišćelow chce Towarstwo Cyrila a Metoda z.t. wšěch katolskich Serbow znowa do zhromadneho skutka wjesć. Ze swojej akciju „Łužica pomha“ chce nimo toho za Caritu w Ełku wěcne dary zběrać.
Smochčanske kubłanišćo swjateho Bena poskićuje wot póndźele do štwórtka, 7. do 10. nowembra, senioram dny rozpominanja. Mjez druhim póńdźe wo aktualne połoženje cyrkwje, wo to, kak Bóh dźensa ludźi do swojeje słužby powoła, ale tež wo poměr katolskeje cyrkwje k druhim nabožinam.
„Wzajomnje so zrozumić – partnersce komunikować“ rěkatej kursaj za pory, kotrež chcedźa swój poćah skrućić. Wonej wotmějetej so wot pjatka do njedźele, prěni wot 25. do 27. nowembra, druhi klětu wot 13. do 15. januara, w Smochčanskim kubłanišću swjateho Bena. Zajimcy měli so hač do pjatka, 11. nowembra, respektiwnje 3. januara online přizjewić.
Dekanatne dušepastyrstwo přeprošuje wšitke dźěći, kotrež so na prěnje swjate woprawjenje přihotuja, na zhromadny dźeń srjedu, 16. nowembra, do Njebjelčic. Přizjewjenja přijimuja so hač do wutory, 1. nowembra.
Drježdźansko-Mišnjanske biskopstwo přeprošuje młodostnych a młodych dorosćenych wot 16 do 35 lět na swětowe zetkanje młodźiny do Lissabona. Serbska skupina budźe při tym dźěl diecezanskeje skupiny. Přizjewjenja přijimuja so hač do njedźele, 22. januara 2023, online.
Serbska protyka
