Katolski Posoł – 2. oktobra 2022
Mjeztym 17. raz podachu so wobydlerjo Marije-Marćineho domu w Pančicach-Kukowje na swój tradicionelny wulět. Někotři z wodźerjow motorskich přijědźechu k tomu wospjet ze Sewjerorynsko-Westfalskeje do Łužicy.
Towarstwo Cyrila a Metoda z.t. přeprosy lětsa znowa na nyšpor z požohnowanjom konjacych zapřahow do Chrósćić. W swojim prědowanju rozłoži serbski duchowny, w kim měli křesćenjo swoju identitu pytać.
Na domchowance w Ralbicach njedźakowachu so pěstowarske dźěći jeničce za płody z polow a ze zahrodow, ale tež za něšto, štož je mnohim samozrozumliwe. Po kemšach přeprosychu młodostni a firmujomni kemšerjow na wosebite wašnje k swójbnemu wosadnemu swjedźenjej.
W Nižozemskej zaklinčachu njedawno serbske zynki. Tam nastawa tuchwilu nowy zwón za jednu z wjesnych kapałkow Kulowskeje wosady. Skupinka wjesnjanow bě sej tam składnostnje leća zwona dojěła.
Pod hesłom „Woda – žórło žiwjenja“ swjećachu wěriwi w Radworju domchowanku. Zhromadnosć hajachu tam tež po dwurěčnej Božej mši.
Što ma italski swjaty z domchowanku činić? Wo tym pisataj Hańžka a Feliks. Zdobom móža so dźěći z pomocu hódančka z pěsnju zeznajomić, kotrejž je w Budyšinje zahroda wěnowana.
W dekanatnym dušepastyrstwje za dźěći a młodźinu we Worklecach ma so 1. januara 2023 dźěłowe městno w pastoralce za dźěći, wobmjezowane jako zastup za dobu staršiskeho časa, wobsadźić. Požadanja su hač do póndźele, 24. oktobra, móžne.
Swoju premjeru změje nowa serbska spěwohra „Z TOBU – Bohu swjećene lěto“ pjatk, 21. oktobra, hakle w 19 hodź. w Chróšćanskej wjacezaměrowej hali „Jednota“. Kartki za cyłkownje pjeć předstajenjow předawaja so pola časnikarja Jürgena Njeka w Chrósćicach abo online.
Serbska protyka
