Katolski Posoł – 11. septembra 2022
Kotre wobrazy móhli so wužiwać, jeli měła so cyrkej jako wosada na geografiskich kartach woznamjenić? Wo tym rozmysluje awtor w swojim zawodnym nastawku. Mjez druhim wón pisa, što móhłoj nošnej mostaj w cyrkwi być a što móhłoj wuskutkować.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so póndźelu, 3. oktobra. Zajimcy měli so online přizjewić.
Z modlenjom kadiša spominaše něhdźe 25 wosobow na pohrjebnišću při Mužakowskej dróze w Budyšinje na zemrětych tamnišeje židowskeje wosady. Nimo kantora Michala Foršta z Praskeje židowskeje wosady, kotryž kadiš ze swojim mócnym hłosom zanjese, wobdźěli so na modlenju tež nowy Budyski wyši měšćanosta.
Drježdźansko-Mišnjanske biskopstwo je přiručku za pastoralne přewodźenje
tych, kiž chcedźa rady wumrěć, wudało. Je to přinošk cyrkwje w aktualnej
debaće wo pomocy při mrěću a sensibilizuje dušepastyrjow za zamołwity wobchad z tutej husto kompleksnej situaciju. Štóž chcył ćišćanu brošurku měć, móže sej ju w biskopskim ordinariaće skazać.
Són z dźěćatstwa je sej serbska zubna lěkarka w Mongolskej spjelniła. Wo swojich dožiwjenjach w aziskim kraju powědaše wona nětko na zetkanju samostejacych ze serbskich wosadow w Smochćicach.
Wo situaciji w swojim kraju a skutkowanju swojeho rjadu powědaše oblatski pater z Ukrainy na swojim wopyće we Łužicy. Zdobom rjekny, zo wobkedźbuje na Božich słužbach podobne wuwiće kaž w Němskej.
We wsy blisko Budyšina wotmě so zaso serbski ekumeniski dworowy swjedźeń. Po pućowanju do bliskeje wokoliny swjećachu wopytowarjo zhromadnje ekumenisku nutrnosć. Wječor je tež serbska dujerska kapała wustupiła.
Towarstwo Cyrila a Metoda z.t. je namjet k přichodej katolskich serbskich wosadow zdźěłało. Katolski Posoł jón w cyłku wozjewi.
Pod hesłom „Słyšeć, štož duch wosady praji“ wotmě so kóždolětne putnikowanje Zhorjelskeho biskopstwa do Noweje Cale. Na nim wobdźělichu so nimo městneho biskopa tež swjećacy biskop juhoněmskeje arcydiecezy a rjadniske sotry, kotrež skutkuja hižo wot julija w Nowej Cali.
Wjace hač 130 wosobow předstaji w historiskej hrě „Mór a lubosć“ žiwjenje před 600 lětami. Dalše předstajenja na farskej zahrodźe w Chrósćicach budu pjatk, sobotu a njedźelu, 16., 17. a 18. septembra, stajnje w 19.30 hodź.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Serbska protyka
