Katolski Posoł – 20. apryla 2025 – jutry
Wšitkim čitarjam, dopisowarjam, roznošowarjam a dobroćelam Katolskeho Posoła kaž tež wužiwarjam našeje internetoweje strony www.posol.de přejemy žohnowane a radostne jutry.
Redakcija
W aktualnym wudaću nańdźeće mjez druhim tole:
Wo perspektiwje, z kotrejež měli jutrowne poselstwo widźeć, pisa serbski duchowny w swojim zawodnym nastawku. Při tym pokaza tež na wuraz, kiž cyłu wumóžersku stawiznu Jězusa zjima.
Na „Hodźinku před Bohom“ běchu wěriwi do Njebjelčanskeje cyrkwje přeprošeni. Wuhotował běše ju wosadny młodźinski chór.
Wšědne žiwjenje steješe lětsa w srjedźišću křižoweho puća młodźiny. Tón běchu so serbscy młodostni tónraz we wsy Chróšćanskeje wosady modlili.
Wěru w zjawnosći su dźěći farskeje wikarije w Pančicach-Kukowje nazhonili. Woni modlachu so bołmončku swój tradicionelny křižowy puć, kotruž bě swójbny pastoralny kružk přihotował.
Łaćonski rukopisny tekst wo Radworskim křižerskim zběžku bu prěni raz do serbšćiny přełoženy a wozjewjeny. Wo pozadkach podawka pisa awtor w swojim přinošku a publikuje tohorunja wony tekst.
Studijo LUCIJA je interviewy z časowymi swědkami, kotřiž wědźa wo serbskej zašłosći rozprawjeć, přihotowała. Prěnje rozmołwy su nětko online přistupne.
Wo jutrownym podawku pisataj Hańžka a Feliks na dźěćacej stronje. Młodźi čitarjo tohorunja zhonja, kotra je najwažniša nóc za křesćanow a što to poprawom rěka, zo je Jězus z mortwych stanył. A tež hódančce wěnujetej so swjedźenju, kotryž cyrkej tutu njedźelu swjeći.
Musical „Mójzes – wuchowany a wuswobodźeny“ z wjace hač 70 sobuskutkowacymi móža wopytowarjo sobotu, 26. apryla, we wjacezaměrowej sportowej hali na Budyskim Třělnišću dožiwić. Započatk je we 18.30 hodź. Zastup je darmotny.
Dekanatne dušepastyrstwo za dźěći a młodźinu we Worklecach přeprošuje šulerki
a šulerjow nětčišich 5. do 8. lětnikow w lěćnych prózdninach na jězbu do Zehrena blisko
Mišna. Wona wotměje so wot póndźele do pjatka, 21. do 25. julija. Přizjewjenja přijimuja so hač do njedźele, 18. meje,
online.
Katolska wosada Marije kralowny róžowca w Radworju pyta za swój dźěćacy dom „Alojs Andricki“ nuznje kubłarku abo kubłarja. Městno je najprjedy hač do junija 2026 wobmjezowane. Požadanja přijimuja hač do srjedy, 30. apryla.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 28. apryla, wot 18.00 do 21.00 hodź. na Budyskej farje. Dalše změja po wutorach, 29. apryla, w Kamjenicy, 13. meje w Lipsku a 27. meje w Drježdźanach planowane, kaž tež štwórtk, 15. meje, online. Zajimcy měli so online přizjewić. To je hač do jednoho tydźenja do woleneho zarjadowanja móžne.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Zajimcy měli so hač do srjedy, 30. apryla, online
přizjewić.
Serbska protyka
