Katolski Posoł – 23. měrca 2025
Bože skutkowanje a Boža lubosć njepokazujetej so w spektakularnych dźiwach, ale w druhich znamjenjach. Wo nich pisa duchowny w swojim zawodnym nastawku a mjenuje někotre přikłady.
Němscy biskopja zetkachu so w Aachenskej diecezy k swojej nalětnjej plenarnej zhromadźiznje. Na njej zaběrachu so mjez druhim z politiskim połoženjom kaž tež systemom připóznawanskeho płaćenja woporam znjewužiwanja.
Samostejacy ze serbskich katolskich wosadow zeńdźechu so w Smochćicach k swojemu lětušemu prěnjemu zetkanju. Trudla Malinkowa přednošowaše jim wo serbskich wupućowarjach do zamórskich kónčin w 19. lětstotku.
W Swjatym lěće móža katolikojo dospołny wotpusk zdobyć. W dekreće wopisuje Vatikan wšelake móžnosće, kotre wuměnjenja maja za to spjelnić.
Nowe impulsy za swoju wěru a poćah k Bohu su wěriwi w Radworju dóstali. Tam wotměchu na spočatku póstneho časa wosadny mision.
„Wodawanje hrěchow“ rěkaše hesło nocy wujednanja, kotruž wotměchu we wobłuku wosadneho misiona w Radworju. W běhu wječora mějachu młodostni a dalši wěriwi składnosć z Bohom so wujednać a na wšelakich stacijach so duchownje posylnić dać.
W Smochćicach zaběraše so dr. Harald Lamprecht ze sociologisko-cyrkwinskeho wida z temu lětušeho póstneho seminara „Wobchad z wohnjowymi murjemi – wotmjezowanje a mjeza“. Mjez druhim wón wuwjedźe, z kim měli ludźo dialog pytać a što měli twarić.
W dalšim dźělu póstneje serije za dźěći su wšelake swětowe nabožiny předstajene, kotrež su w Sri Lance rozšěrjene. Zdobom móža so dźěći tež memory hrajo z temu zaběrać.
Na třećim wječoru lětušeho Ekumeniskeho póstneho seminara w Smochčanskim kubłanišću swjateho Bena, stejacy pod hesłom „Wobchad z wohnjowymi murjemi – wotmjezowanje a mjeza“ porěči póndźelu, 24. měrca, w 19.30 hodź. farar dr. Michael Kleiner. Wón zaběra so z bibliskeho wida z temu, a to pod he słom „Moje plany su hinaše hač waše plany“ (Jezaja 55,8-9). Z filmowym wječorkom póndźelu, 31. měrca, w 19.30 hodź. so rjad skónči.
Wšitcy wěriwi su sobotu, 29. měrca, na nóc wujednanja do Róžeńčanskeje swjatnicy přeprošeni. Wona započnje so w 20.00 hodź. a skónči so z Božej mšu w 23.00 hodź. W běhu wječora změja wěriwi składnosć, so modlić, na hudźbu słuchać abo ćicho wo sebi rozpominać a na Boha słuchać. Zdobom změja zamołwići wšelake stacije spřihotowane. Mjez druhim budźetaj na administraturje Halina a Chrystofer Wjenka w 20.30 a 21.30 hodź. wo zmysle mandźelstwa kaž tež wšelakich dimensijach lubosće pod hesłom „Čehodla so hišće zmandźelić? Teologija mandźelstwa a wosobinske swědčenje“ přednošować. W běhu wječora budźe składnosć, k sakramentej wujednanja, swjatej spowědźi, přistupić, abo wo duchownu rozmołwu prosyć.
Znamjo Drježdźansko-Mišnjanskeho biskopstwa za Swjate lěto, kopija ikony swjateho křiža Assisiskeje cyrkwje w San Damiano, budźe po serbskich wosadach pućować. To zahaji so w nocy wujednanja w Róžeńčanskej swjatnicy sobotu, 29. měrca, a skónči so pjatu póstnu njedźelu, 6. apryla, z putnikowanjom swójbow na samsnym městnje.
Zhromadne dopołdnjo pod hesłom „Wujednaj so!“ wotměje so za šulerjow 6. do 8. lětnika sobotu, 12. apryla, wot 9.00 do 12.00 hodź. w Don Boskowym domje we Worklecach. Tón dźeń wobsteji móžnosć, sakrament wujednanja, swjatu spowědź, přijimać. Přizjewjenja přijimuja hač do póndźele, 7. apryla, online.
Prewencija přećiwo seksualizowanej namocy je wažny wobstatk dźěła z dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Winfriedowy dom w Schmiedebergu woswjeći lětsa swoju 70. róčnicu wobstaća. K jubilejej hromadźa zamołwići domu dopomnjenki a přeprošuja wšitkich, pod hesłom „Twoje dopomnjenki su prašane!“ swoju wosobinsku stawiznu Winfriedoweho domu k jubilejej z druhimi dźělić.
Rakečanska ewangelsko-lutherska wosada wobdźěli so ze swojimi spirituelnymi instalacijemi zwukow a swěcy na wubědźowanju němskeho ewangelskeho měsačnika Chrismon. Hišće hač do štwórtka, 3. apryla, móže ju kóždy podpěrać, z tym zo online za projekt „Spirituelna zwukowa instalacija“ hłosuje.
W putniskej hospodźe w Hirschfeldźe je wot popjelneje srjedy, 5. měrca, hač do njedźele, 27. apryla, druhi króć wobšěrna wustajeńca pasionskich Božich narodkow přistupna. Zajimcy móža pak sej je jeničce we wobłuku wodźenjow wobhladać. Te wotměwaja so stajnje sobotu w 14.00 hodź. Skupiny z wjace hač sydom wosobami móža sej tež swójski termin ze Jeannette Gosteli dojednać.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Za to měli so w přichodnych tydźenjach přizjewić.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić.
Serbska protyka
