Katolski Posoł – 12. januara 2025
W prěnim zawodnym nastawku Swjateho lěta 2025 pozbudźuje biskop Heinrich Timmerevers wěriwych so z putnikami nadźije stać. Mjez druhim wón wuwjedźe, na kotry puć chce jich lěto wjesć.
Bamž Franciskus je loni patoržicu z wotewrjenjom wosebitych wrotow najwjetši katolski putniski podawk zahajił. Tutu njedźelu su wěriwi ze wšěch serbskich wosadow do Róžanta prošeni, hdźež so za nich ze swjatočnym nyšporom tohorunja Swjate lěto zahaji.
Najebać ćežke wuměnjenja wójny w Gazy dla su mniša Jerusalemskeje benediktinskeje abtownje Dormitio zhromadnje z něhdźe sto dalšimi wosobami patoržicu znowa mjena a naležnosće wěriwych ze wšeho swěta do Betlehema njesli. Na pismowej róli stejachu tež jednotliwe mjena Serbow.
Na spytowanja, kotrež křesćanow wot poćaha k Jězusej wotwjedu, skedźbnichu dźěći Ralbičanskeje wosady w swojej hodownej hrě. Woni běchu ju hnydom dwójce předstajili.
Swětła hwězda pokaza pastyrjam w hodownej hrě w Njebjelčicach puć k městnu Jězusoweho naroda w hródźičce. Dźěći běchu ju na swjedźenju Swjateje swójby wosadnym w cyrkwi předstajili.
Dźesaty raz předstajichu dźěći w Róžeńće hodowne poselstwo, wěnujo so prašenju jeho aktualiće w dźensnišim času. Nimo hračka mějachu tam tónraz zdobom wosebitostku.
Na lětnym swjedźenju Kulowskeho Bratrowstwa su mjez druhim čłonojo dźěćaceje dźiwadłoweje skupiny přitomnym někotre serbske powěsćowe postawy na moderne wašnje spřistupnili. Zdobom je hólča hudźbna skupina prěni raz do reje prosyła.
Hodownu atmosferu dožiwichu wopytowarjo hudźbneho nyšpora chóra Lipa w Róžeńće. Koncert běchu tónraz tohorunja nahrawali.
Chróšćanski cyrkwinski chór wuhotowa tež lětsa zhromadnje z dalšimi cyłkami wosady prěnju njedźelu lěta swój tradicionelny hodowny koncert. Idealny zakład za to nańdźe awtorka přinoška pěši po puću do wosadneje wsy.
Składnostnje 130lětneho wobstaća swojeho ćělesa je Radworski chór Meja na swojim nowolětnym koncerće wosebity program předstajił. K někotrym štučkam su jednotliwi spěwarjo tohorunja zarejowali.
Sakscy biskopja su kampanju k wólbam po wšej Němskej wotewrěli. Material k tomu předleži tež w serbskej rěči.
Na serbskeho brašku, kotryž je so před 120 lětami narodźił, pokazuje awtor w swojim přinošku. Mjez druhim sposrědkowa wón tež baseń, z kotrejž je braška hosći na kwasach zawjeselił.
Z filmowym popołdnjom wo spěwohrě „Z TOBU – Bohu swjećene lěto“ su zamołwići a akterojo tónle projekt w Njebjelčicach zakónčili. Jako dopomnjenku běchu za sobuskutkowacych něšto praktiske spřihotowali.
Hudźbne duwo kónclětny meditacisko-hudźbny nyšpor w Baćonju wuhotował, a to w štyrjoch rěčach. K tomu poda lěkarka z wosady wšelake meditaciske mysle.
Jako „nowy dyrdomdej wěry“ mjenuje dotal w farskej wikariji w Pančicach-Kukowje skutkowacy duchowny swój nadawk na wjace hač 750 kilometrow zdalenym městnje. Za to je so wón na přichodne pjeć lět do alpskeho kraja podał.
W Praze je skupina Serbow lońše lěto wuklinčeć dała. Na wuprawu běše Towarstwo Cyrila a Metoda přeprosyło. Mjez druhim zetkachu so tež z duchownym, kotryž běše w 1990tych lětach rektor tehdyšeho Doma biskopa Bena w Smochćicach a pozdźišo propst w Lipsku.
W Ralbicach ma nowy centrum za dušepastyrstwo a turizm nastać. Do hód je serbski architekt wosadnym planowany nowotwar tamnišeho „Radlubina“ předstajił.
Z rjanosću a krasnosću su so serbscy młodostni na swojim kubłanskim dnju w Drježdźanach rozestajeli. Přewodźał bě jich w Romje skutkowacy a studowacy serbski duchowny. Mjez druhim wopytachu wustajeńcu, kotraž bě sławnemu molerjej wěnowana.
W Radworju stara so kružk wo měsačnu Božu słužbu za swójby. Na prěnjej w nowym lěće wěnowachu so duchownym daram, kotrež měli we wosadźe a w swójbach wažnu rólu hrać.
Němsko-čěski fonds přichoda
je z lońšich cyłkownje něhdźe
600 spěchowanych projektow
wony Serbskeho instituta jako
decemberski projekt měsaca
wuzwolił. Při tym jedna so wo trojorěčnu a awdiowizuelnu
wučbnu šćežku we Warnoćicach,
kotraž zaběra so ze stawiznami
Serbow we Warnoćicach
w dobje po kóncu Druheje
swětoweje wójny.
Na putnisku jězbu do Lourdesa a La Salette wot pjatka do njedźele, 16. do 25. meje, přeprošuje Šěrachowski pućowanski běrow A-Teams. Wobdźělnicy wopytaja mjez druhim tež Monaco a Avignon. Dalše informacije a přizjewjenja dóstanu zajimcy pola Matthiasa Hadanka w Hórkach pod telefonowym čisłom (01 63) 7 33 82 05 abo w interneće pod www.ateams.de.
Drježdźansko-Mišnjanske biskopstwo pyta ručež móžno wosobu, kotraž by zarjadnistwo w Kamjenskej wosadźe swjateje Marje Madleny a zdobom Šěrachowskeje wosady swjateje Marije donjebjeswzaća nawjedowała. Při tym jedna so wo połne dźěłowe městno, kotrež njeje časowje wobmjezowane. Zajimcy měli hač do póndźele, 27. januara, swoje podłožki biskopskemu ordinariatej w Drježdźanach sposrědkować.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Pišćelowy nyšpor z mjezynarodnje
koncertowacym dorostowym serbskim organistom Johannesom Krahlom budźe njedźelu, 19. januara, w 17.00 hodź. w Chróšćanskej
wosadnej cyrkwi. Zastup je darmotny, při durjach budźe zběrka. Organist pochadźa z Dobranec a skutkuje tučasnje w Lipsku a Greifswaldźe. Wšitcy zajimcy su přeprošeni.
Składnostnje 100. posmjertnin serbskeho tachanta Jakuba Skale přeprošujetej Towarstwo Cyrila a Metoda z.t. a Maćica Serbska wěriwych na wopomnjenski nyšpor do Budyskeje tachantskeje cyrkwje. Tón budźe njedźelu, 19. januara, w 14.00 hodź. Přizamknjetej so spominanje při jeho rowje na Mikławšku a zhromadna swačina na tachantskej farje.
W putniskej hospodźe w Hirschfeldźe su hač do swjedźenja Předstajenja Knjeza, pjatk, 2. februara, zaso Bože narodki wustajene. Mjez tajkimi, kiž słušeja hižo ke krutemu inwentarej, maja tam tež lětsa zaso nowe.
Spirituelnu zwukowu instalaciju wo psalmje 23 móža wopytowarjo po lěće 2021 znowa w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze swětłowymi efektami. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9.00 do 20.00 hodź. přistupny.
Serbska protyka
