Katolski Posoł – 24. nowembra 2024
Nowemu wobrazej, kotryž nowozakonske čitanje tuteje njedźele wopisuje, wěnuje so serbski duchowny w swojim zawodnym nastawku. Zdobom wón k tomu pohnuwa, hłosej Božemu so wotewrěć.
Před jednym z bunkerow w Tuchorskim lěsu, w kotrychž składowachu w lětach 1984 do 1988 sowjetske rakety typa SS-12, swjećachu na pokutnym dnju něhdźe sto ewangelskich a katolskich křesćanow ekumeniski nyšpor. Serbski teologa rozłoži tři wažne kročele, kotrež njeměli ludźo jeničce z tymle městnom zwjazać.
Towarstwo Cyrila a Metoda je so ze swojej akciju „Łužica pomha“ wospjet za potrěbnych na Mazurach zasadźiło. Kaž direktor zwjazka Carity w Ełkskim biskopstwje zwurazni, so próca a daloki puć wudanitej.
Něhdźe połsta zajimcow wobdźěli so na přeprošenje Towarstwa Cyrila a Metoda na kartyplacanju w Jaseńcy. Tam mějachu dweju dobyćerjow, kotrajž pak sej konkurentaj njeběštaj.
Předsydstwo Maćicy Serbskeje je na swojeho něhdyšeho předsydu dr. Měrćina Völkela składnostnje jeho 90. posmjertnych narodnin spominało. Přitomni běchu při jeho rowje na Chróšćanskim kěrchowje tohorunja jeho wudowa a dalši swójbni.
Na wšelake wašnje su sej w Njebjelčicach dźěći wěru wotkryli. Wone přihotuja so tuchwilu w swojich wosadach na prěnje swjate woprawjenje.
Pod nadpismom „Wulki swět a mała Łužica“ je awtorka rubriki „Katolski Posoł před 100 lětami“ wospjet wšelake zajimawostki našła. Mjez druhim rozprawjachu tehdy wo rozžohnowanju redaktora serbskeho katolskeho časopisa Mikławša Justa.
W čěskich Warnoćicach su kulturnohistorisku wučbnu šćežku wotewrěli. Na wjacorych stacijach předstajeja na nich slědy serbskich šulerjow po Druhej swětowej wójnje w tutym měsće.
Wo žiwjenju, smjerći a wěčnosći rozmysluje serbski duchowny w swojim přinošku. Na přikładźe podawizny wón mjez druhim zwuraznja, štó je křesćanej woprawdźite swětło a z čim to na zemi hižo zwuraznja.
K temje „Stare genomy zwjazuja wulku migracisku žołmu z rozšěrjenjom Słowjanow“ porěča wjacori sobudźěłaćerjo Lipšćanskeho Maxa Planckoweho instituta wutoru, 26. nowembra, w 19.00 hodź. w Budyskim Serbskim domje. Woni budu w němskej rěči přednošować. Maćica Serbska přeprošuje k tomu wšěch, kotřiž so za zažne stawizny Słowjanow zajimuja.
Prěnjej zarjadowani we wobłuku lětušeje kulturneje zymy w putniskej hospodźe Moniki Gerdesoweje w Chrósćicach budźetej sobotu, 30. nowembra. Wot 18.00 do 18.30 hodź. móža dźěći bajku w serbskej rěči słyšeć. „Reportaža z Nowoseelandskeje“ rěka hesło přednoška, kotryž zahaji so w 19.45 hodź. Referent je rozhłosownik Beno Šołta.
Pod titulom „Auf der Rückseite des Mondes – Die Geschichte der Bautzener Beat-Band HERCY“ dožiwi kruch z pjera Lubiny Hajduk Veljkovićoweje, kotryž bu prapremjernje serbsce předstajeny, pjatk 29. nowembra, w Budyskim Němsko-serbskim ludowym dźiwadle swoju němskorěčnu premjeru. Započatk je w 19.30 hodź.
Prapremjera rejowanskeho krucha „Smy! – Bin ich?“, zaběracy so z identitu, budźe sobotu, 30. nowembra, w 19.30 hodź. na žurli Budyskeho Serbskeho ludoweho ansambla. Hižo we 18.00 hodź. su wšitcy zajimcy na wotewrjenje wustajeńcy Helly Stoleccyc a Karoline Krawcec w foyeru ansambla witani. Wuměłči zaběratej so w zwisku z produkciju tohorunja z identitu.
Towarstwo swjateje Filomeny z.t. chce tež lětsa zaso dźěći a swójby w maćerno-dźěćacym domje w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Pakćiki kaž tež poćehnjenja a hygieniske artikle zběraja wot póndźele do štwórtka, 2. do 5. decembra, wšědnje wot 17.00 do 18.00 hodź. w Smjerdźečanskim kulturnym domje.
Drježdźanscy Kapałnicy wuhotuja sobotu, 7. decembra, w 19.30 hodź. adwentny koncert w cyrkwi Smochčanskeho kubłanišća swjateho Bena. Lisćiki za wječor móža sej zajimcy online skazać. Druhu adwentnu njedźelu, 8. decembra, koncertuja kapałnicy w Baćońskej cyrkwi Jězusoweje wutroby. Započatk je w 17.00 hodź.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Serbska protyka
