Katolski Posoł – 5. junija 2022
W aktualnym wudaću nańdźeće mjez druhim tole:
Wichor, w kotrymž je křesćan w dźensnišim času po puću, je jara sylny. To zwěsća awtor w swojim zawodnym nastawku. Zdobom pak wón k tomu přeproša, Swjatemu Duchej so modlić a z dowěru do přichoda hladać.
W Stuttgarće wotmě so kónc meje 102. zjězd katolikow Němskeje. Na nim předstajištaj so Drježdźansko-Mišnjanske a Zhorjelske biskopstwo ze zhromadnym stejnišćom. Tam zajimowachu so wopytowarjo tež za Serbow.
W Bronju je Radworski wosadny farar swjaty křiž poswjećił. Wliw na jeho wuhotowanje měješe tež stil, kotryž zezna swójba w swojich dowolach. Dwurěčnemu nyšporej přizamkny so mały swjedźeń.
W třoch wosadach su dźěći prěni raz k blidu Božemu přistupili. Do swjatočneje Božeje mšě běchu dźěći na wšelake wašnje sobu zapřijate.
Połna zaćišćow nawróći so serbska skupina z bayerskeho Oberammergauwa. Tam běchu sej wobdźělnicy jězby pasionske hry wobhladali. Zdobom zeznachu dalše městna we wokolinje.
Foto: kna
Wjace hač dwě lěće trajace ponowjenje cyrkwje cistercienskeho klóštra w čěskim Oseku je zakónčene. Z dźaknej Božej mšu chcedźa Boži dom sobotu, 18. junija, zaso wotewrěć.
Što woznamjenja zapřijeće „suche dny“ a što maja wone z Wotrowom zhromadneho? Tole rozłožuje awtorka w dalšim dźělu swojeje serije k 250. róčnicy załoženja tamnišeje wosady.
Domchowanka k swjatkam, hdyž so we Łužicy žně ani hišće prawje zahajili njejsu? Hańžka a Feliks njemóžetaj so dodźiwać, jako zhonitaj, kak je k tomu dóšło. Zdobom móža so dźěći w hódančku z płodami Ducha Swjateho zaběrać.
Cyrkwinski chór Lubijsko-Žitawskeje eforije a chór Budyšin předstajitej trójce oratorij „Podlěćo“. Prěnje předstajenje budźe njedźelu, 12. junija, we wobłuku cyrkwinskeho dnja w Bukecach. Dalšej koncertaj sćěhujetej sobotu, 2. julija, w Ketlicach a njedźelu, 3. julija, w Žitawje.
Jurij Šěrak z Lejna, kotryž je zašłe dźewjeć lět redakciju Katolskeho Posoła jako korektor podpěrał, je cyły rjad praktiskich rěčnych pokiwow spisał. Te njepoćahuja so jeničce na prawe pisanje, ale tež na wurjekowanje a přizwukowanje.
