Katolski Posoł – 28. julija 2024
Wo rozdźělnych naladach ludźi w towaršnosći a cyrkwi pisa awtor zawodneho nastawka. A wón podawa recept, kak měli z tymi wobchadźeć, kotřiž snano samo skomolene politiske parole šěrja.
W Drježdźansko-Mišnjanskim biskopstwje płaći nowy porjad za wosadne gremije. W nim je rjadowane, kak ma so z tymi wobchadźeć, kotřiž chcedźa w nich skutkować, kotřiž pak zdobom ekstremistiske nalady zastupuja.
Sta wěriwych poda so na putniske kemše do Krupki. Wobšěrnu rozprawu wozjewi Katolski Posoł w swojim přichodnym wudaću, ale někotre fotowe impresije hižo nětkole.
Najwažniši pósłanc bamža wopyta pjeć dnjow Ukrainu. Tam swjećeše z wěriwymi na wosebitym městnje Božu mšu, zetka pak so tež ze zastupjerjemi kraja a wopyta dźěćacu chorownju, kotraž bu hakle njedawno při nadpadźe ćežko wobškodźena.
W Rakecach je do Božeje mšě młodostny jako wobrotniwy zwóńk napadnył. Ale wón přewza na kemšach hišće tójšto dalšich nadawkow.
Budyšin zhubi duchowny centrum. Klarisy, kotrež běchu wot 1925 w měsće nad Sprjewju, je bórze wopušća. K tomu spisachu rozžohnowanski list, kotryž je w Katolskim Posole wozjewjeny.
Do Ausgburga a wokoliny wjedźeše skupinu Serbow njedawna putniska jězba. Mjez druhim su jara wšelakore česćowanje maćerje Božeje nazhonili.
Awtorka rjadu „Katolski Posoł před 100 lětami” dźiwa so, hdźe su 1924 zjězd serbskich towarstwow wotměli. Wona nańdźe pak tež rozprawu wo putnikowanju Budyskich Serbow do Róžanta kaž tež wo tym, kak je so wysoki duchowny z lěkowanja we Wildungenje zaso do Budyšina nawróćił.
W Kamjenej swjećachu patronatny dźeń swojeje wjesneje kapałki. Wosadny farar skedźbni w tym zwisku na dźensa přesćěhanych křesćanow.
Pod titulom „Štó(ž) wěri? Kak křesćanska je sakska politika?“ přeprošujetaj społnomócnjenaj ewangelskeje a katolskeje cyrkwje pola Swobodneho stata Sakskeje, ordinariatna radźićelka dr. Daniela Pscheida-Überreiter (Katolski běrow Sakska) a wyši cyrkwinski rada Christoph Seele (Ewangelski běrow Sakska), na wječorne zarjadowanje do Budyšina. W srjedźišću stać budu wutoru, 6. awgusta, w 19.00 hodź. w Budyskej ewangelskej wosadnicy Při měšćanskim nasypje 12 wuslědki přepruwowanja wólbnych programow znatych stron za wólby Sakskeho krajneho sejma 2024. Tón wječor chcedźa na nje z perspektiwy křesćanskich zakładnych hódnotow zhladować. Analyzu je Paderbornska Teologiska fakulta pod nawodom profesora dr. Petera Schallenberga zhotowiła Link na nju je deleka podaty. Profesor Schallenberg budźe wšitke tři wječory – nimo w Budyšinje přewjedu tajkej w Lipsku a Schwarzenbergu – přewodźeć. Z impulsowym přednoškom wón analyzu předstaji. Tomu přizamknje so podijowa rozmołwa. Při tym budu zastupjerjo najwšelakorišich cyrkwinskich wobłukow wo swójskich nazhonjenjach diskutować, mjez nimi Andreas Ošika, jednaćel Serbskeho šulskeho towarstwa z.t.
„Nožicy, kamjeń, papjera“ rěka kónc tydźenja, na kotryž su nanojo ze swojimi dźěćimi do Smochčanskeho kubłanišća swjateho Bena přeprošeni. Tón wotměje so wot pjatka do njedźele, 23. do 25. awgusta. Přizjewić móža so zajimcy hač do pjatka, 2. awgusta.
Pod hesłom „Što tam spěwa, lěta, šumi?“ přeprošuje sekcija Swójba Towarstwa Cyrila a Metoda z.t. (TCM) w kooperaciji z Dekanatnym dušepastyrstwom za dźěći na zhromadny dźeń za šulerjow wot 4. do 6. lětnika w Njeswačanskim hrodźe. Tón budźe sobotu, 10. awgusta, wot 10.00 do 14.00 hodź.
Kubłanske dny serbskeje młodźiny wotměja so wot pjatka do njedźele, 27. do 29. septembra, w ponowjenym Schmiedebergskim Winfriedowym domje. Wobdźělnicy změja składnosć po přirodźe pućować, so zhromadnje modlić a spěwać kaž tež duchownje so posylnjeć. Zajimcy měli so hač do póndźele, 29. julija, online přizjewić.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
