Katolski Posoł – 23. junija 2024
Wo wosobje, kotruž njetrjebaja jeničce spěwarjo chóra abo hudźbnicy orchestra, pisa duchowny w swojim zawodnym nastawku. Poćahujo so na ewangelij tuteje njedźele wón mjez druhim k tomu pozbudźuje, so Bohu dowěrjeć a njezrozumliwe přestawki přiwzać.
Nowy dokument z Vatikana namjetuje za katolsku cyrkej wjacore daloko sahace změny. Nazběrane orientacije su wuslědk lětdźesatki trajacych teologiskich dialogow, kotrež su wšelake křesćanske cyrkwje stajnje separatnje z katolskej cyrkwju wjedli.
Ze swjedźenskim nyšporom wopominachu wěriwi wšitkich serbskich wosadow lětsa w Radworju patrona Drježdźansko-Mišnjanskeho biskopstwa a japoštoła Serbow. Wón wotmě so zdobom składnostnje róčnicy podawka, na kotruž dieceza lětsa zhladuje.
Biskop Heinrich Timmerevers je w Drježdźanskej katedrali Božu mšu k česći swjateho Bena swjećił. Wona měješe tež serbski podźěl. Po kemšach donjesechu nowy relikwiar tohole swjateho do nabóčneje kapałki, kotraž je jemu poswjećena a hdźež nańdźe přichodnje swoje krute městno.
Serbska dramaturgowka a awtorka bu w Kamjencu z Mytom Zejlerja wuznamjenjena. Z nim Swobodny stat Sakska jeje mnohostronske zasłužby na polu serbskeje literatury hódnoći.
Prěnja stacija krótkeje lětnjeje koncertoweje jězby znateho hólčeho chóra na kóncu šulskeho lěta po Łužicy běše Božim dom w Chrósćicach. Tam njezanjesechu jeničce z wołtarnišća wěnc pěsnjow pod hesłom „Wyskajće Knjezej“, ale tež z druhich městnow.
Drježdźansko-Mišnjanske biskopstwo chce Smochčanskemu kubłanišću swjateho Bena nowe móžnosće wotewrěć a so sylnišo hač dotal za eksterne skupiny wotewrěć. Bórze chcedźa za to městno jednaćela jako nawody domu wupisać.
Kruh ministrantow w Ralbicach a Róžeńće je rozrostł. We wobłuku njedźelneje Božeje mšě přiwzachu na woběmaj městnomaj nowych hólcow a holcy, kotřiž chcedźa k wołtarjej słužić.
Wjace hač 400 zajimcow je na swójbnu njedźelu Smochčanskeho kubłanišća swjateho Bena přišło. Program měješe tež serbski podźěl.
Z Baćonja pochadźacy serbski organist je wšón swój powołanski čas na samsnym wužadowacym městnje skutkował. Tele dny dokónči wón swoje 70. žiwjenske lěto.
Chór Meja přeproša wšitkich zajimcow na swój lětni koncert na zahrodźe při farskej cyrkwi, kotryž budźe tutu njedźelu, 23. junija. Započatk je z nyšporom w 15.00 hodź.
Klóšterski a swójbny swjedźeń Budyskeho wokrjesa budźe tutu njedźelu, 23. junija, w klóštrje Marijinej hwězdźe w Pančicach-Kukowje. Zhorjelski biskop Wolfgang Ipolt swjeći w 10.30 hodź. w tamnišej cyrkwi swjedźensku Božu mšu. Wot 13.00 do 17.00 hodź. sćěhuja pisany kulturny program kaž tež regionalne a přirodowe wiki.
Wosebity pišćelowy koncert wuhotuje serbski organist a komponist Feliks Brojer njedźelu, 30. junija, w 16.00 hodź. w klóšterskej cyrkwi w Pančicach-Kukowje. Zaklinča jeničce kompozicije młodeho cyrkwinskeho hudźbnika.
Na swjedźensku Božu mšu składnostnje patronata tamnišeje putniskeje cyrkwje Marije wopytanja su wěriwi njedźelu, 30. junija, do čěskich Hejnic přeprošeni. Kemše započnu so w 10.00 hodź.
Kubłanske dny serbskeje młodźiny wotměja so wot pjatka do njedźele, 27. do 29. septembra, w ponowjenym Schmiedebergskim Winfriedowym domje. Wobdźělnicy změja składnosć po přirodźe pućować, so zhromadnje modlić a spěwać kaž tež duchownje so posylnjeć. Zajimcy měli so hač do póndźele, 29. julija, online přizjewić.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Přichodna literarna kofejownja w Budyskim ekumeniskim tachantskim wobchodźe budźe pjatk, 5. julija, we 18.30 hodź. Křesćan Krawc čita ze swojeho němskorěčneho romana „Der Wassermannräuber“. Zastup je darmotny, wo dary proša.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
