Katolski Posoł – 16. junija 2024
Z wašnjom, kak staj staršej serbskeho duchowneho kaž tež jeho bratrow a sotry modlić so wučiłoj, zaběra so wón w swojim zawodnym nastawku. Mjez druhim wón zwuraznja, što je za to trěbne a što zamóže křesćan z tym hišće nawuknyć.
Do noweho relikwiara swjateho Bena je tež serbske wuprajenje zadźěłane. Swoje městno změje sudobjo w kapałce Drježdźanskeje katedrale, kotraž je diecezanskemu patronej poswjećena.
Najebać woteběrace dochody je Bonifacijowy skutk katolikow Němskeje loni wjace projektow spěchował hač do toho. Tole wuchadźa z lětnjeje rozprawy, kotraž bu tele dny w Drježdźanach předstajena.
Wosebity pasion dožiwichu wobdźělnicy kongresa Europasion w Rumunskej. Na nim přijimachu serbscy zastupjerjo skulpturu tohole zetkanja pasionskich zjednoćenstwow, přetož klětu wotměje so te we Łužicy.
Ze skečom, kwisom a wjesołymi pěsnjemi běchu ministranća Njebjelčanskeje wosady lětni swjedźeń seniorow wuhotowali. Zarjadowanje běše zdobom zakónčacy wjeršk prawidłownych zetkanjow do lětnjeje přestawki.
Fairne hry z napjatymi bojemi dožiwichu wobdźělnicy a přihladowarjo w Pěskecach. Tam běchu so serbscy ministranća tež lětsa w kopańcy wubědźowali.
Wo wulkim swjatym, kotrehož cyrkej tutu njedźelu česćuje a kiž je zdobom patron Drježdźansko-Mišnjanskeho biskopstwa, pisataj Hańžka a Feliks. W kóstkowej hrě móža wšitcy potom wuspytać, kak derje tohole swjateho znaja. To a tamne zhonja tohorunja w krótkim wideja.
Nimo zajimawostkow k swjatemu Benej je na dalšej stronje za młodych čitarjow wujimk z dźěćaceje knihi podaty, w kotrejž steji wón tohorunja w srjedźišću. Wona je w Drježdźanskim nakładnistwje Hille w serbskej a němskej rěči wušła. Zajimcy móža sej jej tam kupić. Štóž zajimuje so za serbske wudaće, měł němsku knihu skazać, ale podać, zo přeje sej serbsku (ISBN: 3-932858-97-2). Wot kónca junija budźe serbske wudaće direktnje w internetnym wobchodźe k dispoziciji.
Mała wjera, starc a kocor steja w srjedźišću noweju prózdninskeju lekturow w serbskej rěči. Wonej stej w Budyskim Ludowym nakładnistwje Domowina a Lipšćanskim nakładnistwje Veles wušłej.
Knižna premjera publikacije „Narodninska torta za Findusa“ budźe njedźelu, 23. junija, w 15.30 hodź. na Glawšec dworje w Róžeńće.
Chór Meja přeproša wšitkich zajimcow na swój lětni koncert na zahrodźe při farskej cyrkwi, kotryž budźe njedźelu, 23. junija. Započatk je z nyšporom w 15.00 hodź.
Klóšterski a swójbny swjedźeń Budyskeho wokrjesa budźe njedźelu, 23. junija, w klóštrje Marijinej hwězdźe w Pančicach-Kukowje. Zhorjelski biskop Wolfgang Ipolt swjeći w 10.30 hodź. w tamnišej cyrkwi swjedźensku Božu mšu. Wot 13.00 do 17.00 hodź. sćěhuja pisany kulturny program kaž tež regionalne a přirodowe wiki.
Wosebity pišćelowy koncert wuhotuje serbski organist a komponist Feliks Brojer njedźelu, 30. junija, w 16.00 hodź. w klóšterskej cyrkwi w Pančicach-Kukowje. Zaklinča jeničce kompozicije młodeho cyrkwinskeho hudźbnika.
Na swjedźensku Božu mšu składnostnje patronata tamnišeje putniskeje cyrkwje Marije wopytanja su wěriwi njedźelu, 30. junija, do čěskich Hejnic přeprošeni. Kemše započnu so w 10.00 hodź.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Smochčanske kubłanišćo swjateho Bena přeprošuje tež lětsa na swójbnu njedźelu. Wona budźe tutu njedźelu, 16. junija, wot 10.30 do 15.00 hodź. Po swójbnych kemšach wočakuje hosći zaso pisany jewišćowy program, mjez druhim z hudźbu, serbskimi rejemi, klankodźiwadłom kaž tež dźěćacym cirkusom Krabatino.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
