Katolski Posoł – 5. meje 2024
Swójske dožiwjenje zwjaza duchowny z nazhonjenjom wučomnikow, jako Jězus do njebjes spěješe. Podawk widźi wón tež w přirodźe so špihelować. Wón podawa tež pokiwy, na čo měł kóždy sam dźiwać.
Wot sydom muži nasta poněčim mjezynarodny socialny zwjazk, kotryž wobsteji mjeztym 175 lět. Tež we Łužicy je wón na někotrych městnach aktiwny.
W Bukowcu je ewangelski farar w přitomnosći mnohich katolikow swjaty křiž poswjećił. Za postajenje je namakanka wěstu rólu hrała.
Jako wulke wobohaćenje začuwachu wobdźělnicy wukubłanje JuLeiCa. Za klětuše móža so zajimcy hižo nětkole přizjewić. – wjace fotow – přizjewić so
Za Drježdźansko-Mišnjanske biskopstwo je nowy młodźinski dušepastyr pomjenowany. Zapokazany pak budźe hakle srjedź septembra.
Multimedialnje móža so zajimcy wot klětu nazymy wo klóštrje Marijinej hwězdźe a katolskich Serbach so wobhonić. Ministerka je přizwolenje spěchowanja přepodała.
Radworscy wohnjowi wobornicy móža na přichodnych dźaknych kemšach woborow w Róžeńće z chorhoju zaćahnyć. Tu je jich wosadny farar poswjećił.
Wo swjatym, kotryž je patron wohnjowych wobornikow, staj Hańžka a Feliks wjele zhoniłoj. Zdobom je na dźěćacej stronje wosebity nadawk spřihotowany.
Składnostnje Swjateho lěta 2025 přeprošuje Sakski katolski zwjazk za kubłanje dorosćenych (KEBS) zhromadnje ze swojim ewangelskim wotpowědnym zwjazkom na ekumenisku putnisku jězbu z Drježdźan na Assisi do Roma. Wona wotměje so lětsa wot póndźele do póndźele, 30. septembra do 7. oktobra.
Sakski katolski zwjazk za kubłanje dorosćenych (KEBS) pyta ručež móžno wosobu, kotraž by so wo projekt „Synergetiski transferny rum Łužica“ (SynTraL) starała. Zwjazkowe ministerstwo za kubłanje a slědźenje projekt spěchuje.
Lětuši Gig-festiwal je wot pjatka do njedźele, 5. do 7. julija, w Róžeńće planowany. Program kaž tež přehlad wobdźělnikow stej hižo znatej.
We Worklečanskim Don Boskowym domje poskićuja dalekubłanje na polu prewencije před seksualizowanej namocu. Přizjewjenja přijimuja online.
Lětuši 103. zjězd katolikow wotměje so wot srjedy 29. meje, do njedźele, 2. junija, w Erfurće – runje wokoło swjedźenja Božeho ćěła. Towarstwo Cyrila a Metoda z.t. (TCM) poskićuje wěriwym ze serbskich wosadow sobotu, 1. junija, busowu jězbu do Erfurta. Přinošk za jězbu wučinja 35 eurow na wosobu. Zajimcy měli so w redakciji Katolskeho Posoła přizjewić.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
We Wósporku je hišće hač do soboty, 11. meje, dožiwjenska wustajeńca wo bibliji přistupna. Pod hesłom „Qumran, Luther a biblija: Wot klinoweho pisma k nanobibliji, Jezajowa róla a mnoho dalšeho. Najwjetša mobilna bibliska wustajeńca Europy“ pokazuja w přehladce mjez druhim wosebite wudaća Swjateho pisma kaž tež zajimawostki k jeje stawiznam. Wustajeńca je wšědnje wot 14.00 do 18.00 hodź. wotewrjena, njedźelu hižo wot 11.00 hodź.
Wěriwi z Němskeje, Pólskeje a Čěskeje su sobotu, 11. meje, na putnikowanje wujednanja do čěskich Hejnic prošeni. Boža mša w hnadownej cyrkwi zahaji so w 10.30 hodź.
Na dźěłarničce k pjelsćowanju črijow su wšitcy zajimcy do Smochčanskeho kubłanišća swjateho Bena přeprošeni. Kurs za započatkarjow so wot štwórtka, 30. meje, do njedźele, 2. junija, wotměje, dalši dźěl za pokročenych pak wot štwórtka do njedźele, 20. do 23. junija. Přizjewjenja přijimuja hač do póndźele, 6. meje.
Smochčanske kubłanišćo swjateho Bena přeprošuje wšitkich zajimcow na seminar pod hesłom „Mocy rostlinow – dźiwje zela, hojenske rostliny a drohotne esency“. Tón wotměje so wot pjatka do njedźele, 7. do 9. junija. Přizjewjenja su hač do pjatka, 17. meje móžne.
Serbska protyka
