Katolski Posoł – 17. měrca 2024
W swojim zawodnym nastawku wěnuje so serbski duchowny prašenju „Kajke móhło sebjezwoprawdźenje w Jězusowym zmysle wupadać?“ Mjez druhim wón při tym wuwjedźe, što móže kóždy jednotliwc za to činić a što je křesćanam měritko.
Wuprajenja bamža Franciskusa k měrowym jednanjam rusku nadběhowansku wójnu přećiwo Ukrainje nastupajo su narodnje a mjezynarodnje rozdźělne reakcije zbudźili. Spočatk měrca wozjewi zdobom skupina dwaceći Serbow list prezidentomaj wobeju krajow z namołwu wo měr a skónčenje morjenja.
Informacije k Swjatemu lětu 2025 w Romje su wotnětka tež w němskej rěči online přistupne. K tomu słušeja mjez druhim pokiwy k putnikowanju do Wěčneho města a nastorki k modlenju.
Wo citaće něhdyšeje němskeje kanclerki kaž tež aktualneho kanclera rozmysluje awtor w dalšim dźělu swojeje póstneje serije. Złožiwši so na ewangelij tuteje njedźele a podawki martrowneho tydźenja wón mjez druhim wuwjedźe, kak móže křesćan do přichoda kročić.
W Smochćicach zhromadźichu so samostejacy ze serbskich wosadow k swojemu lětušemu prěnjemu zetkanju. Na nim předstajištej referentce dekanatneho dušepastyrstwa za dźěći a młodźinu swoje dźěło.
Biskop najmjeńšeje a najwuchodnišeje diecezy Němskeje woswjeći tutu njedźelu kulowate narodniny. Na teritoriju, kotryž wot lěta 2011 nawjeduje, bydla tež serbscy wěriwi.
Relewanca cyrkwje w towaršnosći steješe w srjedźišću třećeho Ekumeniskeho póstneho seminara w Smochćicach. Mjez druhim referent, kiž je předsyda frakcije CDU w Sakskim krajnym sejmje, wuwjedźe, kotre nadawki cyrkej ma, kak pak nima jednać.
Hornjołužiski zwjazk Carity poskićuje zakładne kursy k susodskej pomocy. Socialny dźěłaćer w interviewje za Katolski Posoł rozłožuje, što ma so wšitko wobkedźbować.
Smochčanske kubłanišćo swjateho Bena přeprošuje na dny k praktiskej žiwjenskej pomocy a swójskim nazhonjenjam pod hesłom „Kak to jeno rozrisam? Systemiske nastajenje k wujasnjenju wosobinskich naležnosćow“. Kurs wotměje so stajnje wot pjatka do njedźele, 5. do 7. apryla, kaž tež 25. do 27. oktobra.
W lětušej jutrownej wustajeńcy Budyskeho Serbskeho muzeja, kotraž budźe wot njedźele, 17. měrca, hač do njedźele, 5. meje přistupna, wěnuja so zaso nałožkam a tradicijam Serbow wot zeleneho štwórtka hač k jutrońčce.
Zdobom zhonja zajimcy w muzeju wjace ke kmótřiskim daram ze serbskim hrónčkom.
Pod hesłom „Wujednaj so!“ wotměje so za šulerjow 6., 7. a 8. lětnika sobotu, 23. měrca, zhromadny dźeń w Don Boskowym domje we Worklecach. Na tym dnju wobsteji móžnosć, sakrament wujednanja přijimać. Přizjewjenja su hač do póndźele, 18. měrca, online móžne.
Křižowy puć modli so dekanatna młodźina bołmončku, 24. měrca, w 14.00 hodź. w Šunowje a Konjecach. Započatk je w kapałce na klóšterskim kuble w Šunowje. Młodostni jednotliwych wosadow njech přinjesu swój młodźinski baner sobu. Trěbna digitalna knižka za křižowy puć budźe wot štwórtka, 21. měrca, na internetowej stronje dekanatneho dušepastyrstwa młodźiny k dispoziciji.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Pastyrske słowo biskopa Heinricha k jutrownemu pokutnemu časej 2024
...
Hirtenwort von Bischof Heinrich zur Österlichen Bußzeit 2024
Serbska protyka
