Katolski Posoł – 18. februara 2024
Póstny čas je přeprošenje a dopomnjenje. Kak móhli wěriwi tele tydźenje přihota na jutry za swoje zbožo wužiwać, wopisuje serbski duchowny w swojim zawodnym nastawku.
Rada katolikow w Drježdźansko-Mišnjanskim biskopstwje na spočatku póstneho časa k tomu namołwja, demokratiju a čłowječu dostojnosć sylnić. To wozjewi gremij w swojim lisće k popjelnej srjedźe.
Wo darjenym času pisa awtor w swojim teologiskim zhladowanju k prěnjej póstnej njedźeli. Přinošk je zdobom zazběh do lětušeje póstneje serije Katolskeho Posoła.
W Baćonju wotmě so hłowna zhromadźizna Towarstwa Cyrila a Metoda z.t. Na njej su so mjez druhim z naćiskom nowych wustawkow zaběrali.
Naposledk w Budyšinje bydlacy duchowny je čas swojeho měšniskeho skutkowanja swoje mysle w ćišinje modlenja tworił. Nětko je oratorian farar dr. Siegfried Foelz na prawdu Božu wotešoł.
Dekanatna młodźina
je w póstnym času na
zhromadne wječorne modlenja
přeprošena. Sobotu, 24. februara, wotměje so wone
w Chrósćicach. Po tym zahraja sej hry w Hórnikowym domje.
Dekanatne dušepastyrstwo za dźěći zarjaduje za šulerjow 4. a 5. lětnika zhromadny dźeń w póstnym času pod hesłom „Z Jězusom po puću“. Tón wotměje so sobotu, 24. februara, we Worklečanskim Don Boskowym domje. Přizjewjenja přijimuja hač do wutory, 20. februara, online.
W Smochčanskim kubłanišću swjateho Bena wotměje so tež lětsa Ekumeniski póstny seminar. Wón steji tónraz pod hesłom „Nadal dosć městna – W kotrej měrje je cyrkej za towaršnosć trěbna?“ a zahaji so póndźelu, 26. februara.
Hornjołužiske telefonowe dušepastyrstwo přeprošuje na rjad přednoškow wo depresijach, prewenciji přećiwo suicidej, samoće a psychiskej strowoće. Wón steji pod hesłom „Njejsy sam“ a wotměje so wotměnjejo w Šěrachowje a Kamjencu.
Sekcija Wěda a skutk Towarstwa Cyrila a Metoda z.t. (TCM) přewjedźe wot soboty do srjedy, 21. do 25. septembra, wulět do Ruhpoldinga. Zajimcy měli so hač do štwórtka, 29. februara, w redakciji Katolskeho Posoła přizjewić.
Młodźinske dušepastyrstwo přeprošuje młodostnych sej zhromadnje dźiwadłowu hru „Na tamnym boku měsačka – HERCY“ wobhladać, a to sobotu, 6. apryla, w 19.30 hodź w Budyskim Němsko-Serbskim ludowym dźiwadle. Kartku dóstanu
młodostni za potuńšenu płaćiznu pjeć eurow. Přizjewjenja přijimuja hač do póndźele, 11. měrca, online.
Hornjołužiski zwjazk Carity pyta k najblišemu móžnemu terminej za swoju dnjowu hladarnju we Worklecach přidatnu hladansku wosobu. Wobmjezowane dźěłowe zrěčenje je na minimalnje 20 hodźin wupisane, zwyšenje hodźin a podlěšenje zrěčenja pak je móžne.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Nowu spirituelnu zwukowu instalaciju k temje „Lubowany“ móža wopytowarjo w Rakečanskej ewangelskej cyrkwi dožiwić. Wuwił a zwoprawdźił je ju znowa komponist Norbert Binder z podpěru tamnišeho Pawołskeho chóra. Swětłowe efekty hudźbu wizuelnje podkładu.
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. K tomu trěbnu wědu posrědkuje w zakładnym kursu, kotryž wotměje so wot 20. měrca hač do 4. meje trójce srjedu kaž tež štyri króć sobotu.
Serbska protyka
