Katolski Posoł – 11. februara 2024
Wo symbolu a wobrazu hrěcha pisa serbski duchowny w swojim zawodnym nastawku. Zdobom pokazuje wón na lěkarja, kotryž zamóže čłowječu dušu wuhojić.
Zajimcy móža sej swjate sćenje po Mateju wotnětka w serbskej rěči předčitać dać. Wone je na youtubowym kanalu Serbskeho ewangelskeho towarstwa, kotrež je projekt zwoprawdźiło, přistupne.
W Radworju swjećachu wěriwi ze serbskich wosadow swjedźensku Božu mšu na wopomnjenskim dnju zbóžneho kapłana Alojsa Andrickeho. W swojim prědowanju pokaza serbski duchowny mjez druhim na to, kak móžeš ze zbóžnymi a swjatymi zwjazany a žiwy być.
W swojich lětušich póstnych prědowanjach wěnuja so serbscy duchowni wšelakim swjatym a dalšim wažnym wosobam Swjateho pisma. Přehlad je w Katolskim Posole a tule wozjewjeny.
Formje, kotraž stawizny čłowjeka na jeho ćěle zwěčnja, wěnuje so serbski duchowny w swojim přinošku. Kaž znaty němski kapucinski pater, kotrehož tohorunja cituje, raz sformulowa, jedna so při tym wo stalětnu křesćansku tradiciju.
W póstnym času wzdadźa so mnozy wěsteje chłóšćenki. Tola to njeje tež z cyrkwinskeho wida scyła trjeba, kaž awtorka w jeje přinošku pisa.
Z křesćanskej myslu mjezsobneje podpěry a zachowanja stwórby bu před lětom projekt w Kamjencu nastorčeny. Poskitk Carity měri so na młode swójby a je pódla katolskeje pěstowarnje města zarjadowany.
Hornjołužiske telefonowe dušepastyrstwo přeprošuje na rjad přednoškow wo depresijach, prewenciji přećiwo suicidej, samoće a psychiskej strowoće. Wón steji pod hesłom „Njejsy sam“ a wotměje so wotměnjejo w Šěrachowje a Kamjencu.
Dekanatne dušepastyrstwo za dźěći zarjaduje za šulerjow 4. a 5. lětnika zhromadny dźeń w póstnym času pod hesłom „Z Jězusom po puću“. Tón wotměje so sobotu, 24. februara, we Worklečanskim Don Boskowym domje. Přizjewjenja přijimuja hač do póndźele, 19. februara, online.
Młodźinske dušepastyrstwo přeprošuje młodostnych sej zhromadnje dźiwadłowu hru „Na tamnym boku měsačka – HERCY“ wobhladać, a to sobotu, 6. apryla, w 19.30 hodź w Budyskim Němsko-Serbskim ludowym dźiwadle. Kartku dóstanu
młodostni za potuńšenu płaćiznu 5,00 eurow. Přizjewjenja přijimuja hač do póndźele, 11. měrca, online.
Hornjołužiski zwjazk Carity pyta k najblišemu móžnemu terminej za swoju dnjowu hladarnju we Worklecach přidatnu hladansku wosobu. Wobmjezowane dźěłowe zrěčenje je na minimalnje 20 hodźin wupisane, zwyšenje hodźin a podlěšenje zrěčenja pak je móžne.
Sekcija wěda a skutk Towarstwa Cyrila a Metoda z.t. (TCM) přewjedźe wot soboty do srjedy, 21. do 25. septembra, wulět do Ruhpoldinga. Zajimcy měli so hač do štwórtka, 29. februara, w redakciji Katolskeho Posoła přizjewić.
Nowu spirituelnu zwukowu instalaciju k temje „Lubowany“ móža wopytowarjo wot njedźele, 4. februara, w Rakečanskej ewangelskej cyrkwi dožiwić. Wuwił a zwoprawdźił je ju znowa komponist Norbert Binder z podpěru tamnišeho Pawołskeho chóra. Swětłowe efekty hudźbu wizuelnje podkładu.
W Smochčanskim kubłanišću swjateho Bena wotměje so tež lětsa Ekumeniski póstny seminar. Wón steji tónraz pod hesłom „Nadal dosć městna – W kotrej měrje je cyrkej za towaršnosć trěbna?“ a zahaji so póndźelu, 26. februara.
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. K tomu trěbnu wědu posrědkuje w zakładnym kursu, kotryž wotměje so wot 20. měrca hač do 4. meje trójce srjedu kaž tež štyri króć sobotu.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Serbska protyka
