Katolski Posoł – 19. nowembra 2023
Najwjetša bursa na swěće ma něšto z ewangelijom tuteje njedźele zhromadneho. Wo tym pisa awtor w swojim zawodnym nastawku. Zdobom wón zwuraznja, što je na kóncu před Bohom rozsudne.
Katolska cyrkej wobdźěli so prěni raz na studiji, w kotrejž přepytowachu cyrkwinske čłonstwo. Po wuprajenju němskeho biskopa podawa wona njebarbjenu realitu zaso. Ewangelska cyrkej tajku studiju wot 1972 kóžde dźesać lět předpołoži.
Nadal aktualna hra wo katolskej Serbowce židowskeho pochada změje spočatk decembra w němskej rěči swoju prapremjeru. Prěni króć chce Budyske Němsko-Serbske ludowe dźiwadło při tym tež serbsku rěč we wjetšim ramiku do němskeje inscenacije zapřijeć, hač je so to dotal stało.
W Kolumbiskej bu z Kulowa pochadźacy jezuit na diakona wuswjećeny. W rozmołwje wón mjez druhim zwurazni, što je jeho pohnuło, do tohole rjadu zastupić.
W Budyšinje woswjeći něhdyša hospoza mjeztym zemrěteho serbskeho duchowneho swoje 80. narodniny. Njehladajo tuteje staroby so wona nadal na wjacorych polach angažuje.
Na ekumeniski temowy dźeń pod hesłom „Um:Wege zu finden – za sprawnosć, měr a zdźerženje Božeje stwórby“ su wšitcy zajimcy na pokutnym dnju, srjedu, 22. nowembra, do Budyšina přeprošeni. Započatk je w 10.00 hodź. z ekumeniskej Božej słužbu w tachantskej cyrkwi swjateho Pětra. Přizamknu so tematiski puć po Sprjewinym měsće ze wšelakimi stacijemi a dźěłarnički k rozdźělnym temam.
Dekanatne dušepastyrstwo za dźěći přeprošuje šulerki a šulerjow 5. do 8. lětnika klětu w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija 2024. Přizjewjenja přijimuja hač do njedźele, 31. měrca 2024, online.
Towarstwo swjateje Filomeny z.t. chce tež lětsa zaso dźěći a swójby w maćerno-dźěćacym domje w čěskim Dolním Podluží kaž tež w bołharskim Razgradźe a wokolnych wsach z hodownymi pakćikami zwjeselić. Pakćiki kaž tež poćehnjenja a twory hygieny zběraja wot póndźele do štwórtka, 27. do 30. nowembra, wšědnje wot 17.00 do 18.00 hodź. w kulturnym domje w Smjerdźacej.
Pod hesłom „Wo přeću, darjenju a wobdarjenju“ přeprošuje Smochčanske kubłanišćo swjateho Bena seniorow na zhromadne adwentne dny. Wone wotměja so wot póndźele do štwórtka, 4. do 7. decembra.
Po tym zo bu pomnik swjateju Cyrila a Metoda pola Stróžišća
lětsa spočatk februara skóncowany a z tym wonječesćeny,
mjeztym pak zaso sporjedźany, přeprošuje Towarstwo Cyrila
a Metoda na nyšpor ze znowaposwjećenjom.
Tón budźe njedźelu Chrysta Krala, 26. nowembra,
w 14.00 hodź.
Sekcija Swójba Towarstwa Cyrila a Metoda přeprošuje
wšitkich zajimcow na škotowy turněr, kotryž wuhotuje wutoru,
21. nowembra, we 18.30 hodź.
w Jasčanskej „Bjesadźe“. Za tych, kotřiž njemóža škot hrać, zarjaduje so zdobom
turněr z kartowej hru rommé.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Prěni termin budźe hižo wot 19. do 21. januara, a nic kaž dotal wozjewjene spočatk februara. Druhi dźěl sćěhuje wot 26. do 28. apryla.
Serbska protyka
