Katolski Posoł – 28. meje 2023
Wo tym, štož wšitke sydom darow Ducha Swjateho zwjazuje, pisa serbski duchowny w swojim zawodnym nastawku. Zdobom wón rozłožuje, što ma tónle zwjazowacy element z cyrkwju a wěru činić.
K zaměrnemu modlenju wo duchowne powołanja pozbudźi serbski duchowny w Róžeńće. Do tamnišeje swjatnicy bě Towarstwo Cyrila a Metoda na mejski nyšpor přeprosyło.
W Kulowje je šěsć serbskich dźěći prěni raz k blidu Božemu přistupiło. Napjeći běchu tući hižo při zwučowanju dźeń do toho.
Kotra wěrnosć ma jeničce w křesćanskej wěrje swój kruty fundament? Wo tym pisa serbski duchowny w swojim rozmyslowanju k swjatkam.
„Wulka wutroba, wotewrjenej woči“ běše hesło za dźesać prěnjowoprawjenskich dźěći w Pančicach-Kukowje. Swjedźenske kemše je chór Lipa wobrubił.
Kak móže křesćan swjatkownje žiwy być? Wo tym pisa serbski duchowny w dalšim dźělu swojeje serije „Wěra praktisce“.
Wo putnikowanju, kotrež so tež dźensa hišće takle wotměwa, pisaše Katolski Posoł před 100 lětami. Zdobom nańdźe awtorka rubriki rozprawu, kak dožiwi duchowny w Romje nabožny nałožk, kotryž je tež w serbskich wosadach rozšěrjeny.
Što ma hesło noweje wustajeńcy w Budyskim Serbskim muzeju z katolskimi Serbami činić? Na tele prašenje wotmołwja kuratorka přehladki w swojim přinošku.
Lětuše putnikowanje serbskeje dekanatneje młodźiny do Róžanta budźe njedźelu, 4. junija. Młodostni njech so dojednaja, hač chcedźa so jako wosadna młodźina sami do Róžanta podać abo hač přiwozmu poskitk zhromadneho putnikowanja z Worklec. Wšitcy, kiž chcedźa wottam putnikować, zetkaja so w 9.00 hodź. w tamnišej kapałce. Wotchad procesiona je w 9.15 hodź. Boža mša w Róžeńće budźe w 10.30 hodź. Po kemšach so młodostni w procesionje do Worklec nawróća. Ći, kotřiž su so za Swětowe zetkanje młodźiny w Lissabonje přizjewili, wostanu w Róžeńće. Za nich přizamknje so tam předzetkanje. Młodostni njech přinjesu sej swój młodźinski baner sobu.
K modlenju a na Bože mšě před kopiju postawy sławneje Fatimskeje putniskeje madony su wěriwi w juniju w Drježdźansko-Mišnjanskim, Zhorjelskim a Litoměřickim biskopstwje přeprošeni. Mjez druhim budźe postawa w putniskej cyrkwi w Róžeńće, w cyrkwi Marije donjebjeswzaća w Kulowje kaž tež w klóšterskej cyrkwi klarisow w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wón wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach. Přizjewjenja přijimuja hižo nětko online.
Pod hesłom „Žona – druha strona čłowjestwa“ přeprošuje Smochčanske kubłanišćo swjateho Bena na dny rozpominanja z filmom, kotrež wotměja so wot srjedy do njedźele, 21. do 25. junija. Přizjewjenja přijimuja hač do štwórtka, 1. junija.
„Kedźbu pasle! Kak prawicarscy ekstremisća a reichsbürgerojo demokratiju podrywaja“ rěka hesło zarjadowanja, na kotrež su wšitcy zajimcy, wosebje politisce angažowani, wobydlerjo, zastupjerjo gmejnskich radow kaž tež lokalnych organizacijow a institucijow přeprošeni. Wone wotměje so srjedu, 14. junija, wot 19.00 do 21.00 hodź. w Jakubetzowym wustawje w Kulowje.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Čłowječej noze stejitej w srjedźišću zarjadowanja za nanow a jich dźěći, kotrež wotměje so wot pjatka do njedźele, 16. do 18. junija, w Smochčanskim kubłanišću swjateho Bena. Přizjewjenja přijimuja w Smochćicach.
We Worklečanskim Don Boskowym domje poskića dalekubłanje na polu prewencije před seksualizowanej namocu. Přizjewjenja přijimuja hač do póndźele, 5. junija.
Wšelake hódančka a dalše zaběry za dźěći su tule přistupne.
Katolska wosada Marije kralowny róžowca w Radworju pyta za swój dźěćacy dom „Alojs Andricki“ k 1. junijej kubłarku abo kubłarja. Požadanja přijimuja hač do srjedy, 31. meje.
Serbska protyka
