Katolski Posoł – 7. meje 2023
Wo zakładnym wuprajenju ewangelija tuteje njedźele pisa awtor w swojim zawodnym nastawku. Mjez druhim wón rozłoži, što chce Jězus křesćanam z tym rjec.
Bamž Franciskus je kónc apryla Madźarsku wopytał. Nimo zetkanjow ze zastupjerjemi cyrkwje, politiki a towaršnosće je wón cyły europski kontinent někomu k škitej dowěrił.
Biskop Heinrich Timmerevers je w Baćonju sakrament swjateho firmowanja wudźělił. Jeho prědowanje na swjedźenskej Božej mši běše za přitomnych wužadace, ale přiměrjene.
Na čo měli wšitcy, kotřiž słowo Bože wozjewjeja, ale tež serbski lud sadźeć, wo tym pisa serbski duchowny w swojim rozmyslowanju. K tomu pohnuło je jeho dožiwjenje před něšto lětdźesatkami.
Wo mejskej róži a marijanskim měsacu pisataj Hańžka a Feliks. Dale móža so dźěći z rostlinami a płodami zaběrać, kotrež jewja so hižo w Swjatym pismje a kotrež tež dźensa hišće nańdźeš. Zdobom su wotnětka wšelake hódančka a dalše zaběry za dźěći online přistupne.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Čłowječej noze stejitej w srjedźišću zarjadowanja za nanow a jich dźěći, kotrež wotměje so wot pjatka do njedźele, 16. do 18. junija, w Smochčanskim kubłanišću swjateho Bena. Přizjewjenja přijimuja w Smochćicach.
We Worklečanskim Don Boskowym domje poskića dalekubłanje na polu prewencije před seksualizowanej namocu. Přizjewjenja přijimuja hač do póndźele, 5. junija.
Katolska wosada Marije kralowny róžowca w Radworju pyta za swój dźěćacy dom „Alojs Andricki“ wot 1. junija kubłarku abo kubłarja. Požadanja přijimuja hač do pjatka, 12. meje.
Serbska protyka
