Katolski Posoł – 22. januara 2023
W aktualnym wudaću nańdźeće mjez druhim tole:
Wo bibliskim městnje Kafarnaum a paraleli k dwurěčnej Łužicy pisa awtor w swojim zawodnym nastawku. Zdobom wón k tomu pohnuwa, raz do hinašeho směra myslić.
Rozměr namocy přećiwo křesćanam po wšěm swěće je nowy najwyši staw docpěł. Wo tym rozprawja pomocny skutk Open Doors w swojim 30. swětowym indeksu přesćěhowanja. Wón wobsahuje 50 krajow z najhóršim přesćěhowanjom křesćanow.
„Lubosć k blišemu trjeba wobstajne wotewrjenje a dźeń a wjetšu uniwersalnosć.“ Tole zwurazni Zhorjelski biskop Wolfgang Ipolt na nowolětnym přijeću w měsće nad Nysu. Na zarjadowanju wobdźělichu so zastupjerjo cyrkwjow, politiki a towaršnosće.
Z lětnym swjedźenjom zahaji Kulowske Bratrowstwo w Sulšecach swoje jubilejne lěto. Na tym dnju planowanu premjeru wjeselohry dyrbjachu pak přestorčić.
W Kamjencu poskićeja nowy žarowanski kruh za dźěći. Wón zahaji so štwórtk, 26. januara, a je na dwě lěće zapołoženy. Paralelnje změja tajki kruh tež za dorosćenych.
Dwanaće wosobow z wjacorych katolskich serbskich wosadow je sej w Smochčanskim kubłanišću swjateho Bena kmanosće k nawjedowanju skupin přiswojiło. Woni wobdźělichu so tam na prěnim dźělu wukubłanju JuLeiCa.
Kónc lońšeho a spočatk tohole lěta běchu tež w Chróšćanskej wosadźe zaso wjacore skupiny dźěći jako hwězdni spěwarjo po puću, mjez druhim w Smječkecach. Hesło nětčišeje akcije rěkaše „Dźěći skrućić a dźěći škitać – w Indoneskej a po wšěm swěće“.
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Štóž chcył wukubłanje absolwować, měł so pola hospicneje słužby Carity w Kamjencu přizjewić.
Pod hesłom „Pój, wjesel so!“ přeprošuje Dekanatne dušepastyrstwo za dźěći šulerjow 1. a 2. lětnika na zhromadny dźeń do Don Boskoweho domu we Worklecach, kotryž wotměje so wutoru, 14. februara. Zajimcy měli so hač do njedźele, 5. februara, online přizjewić.
Lětsa wotměja so w Smochčanskim kubłanišću swjateho Bena zaso tři seminary k přihotej na sakrament mandźelstwa. Prěni budźe wot pjatka do soboty, 3. do 4. měrca. Přizjewjenja přijimuja hač do srjedy, 25. januara, online.
Drježdźansko-Mišnjanske biskopstwo přeprošuje młodostnych a młodych dorosćenych wot 16 do 35 lět na swětowe zetkanje młodźiny do Lissabona. Serbska skupina budźe při tym dźěl diecezanskeje skupiny. Přizjewjenja přijimuja so hač do njedźele, 22. januara 2023, online.
Serbska protyka
